تخيل انك صحيت من النوم متأخر، ملحقتش تفطر، جريت ع الشغل،
قاعد تحرق في قهوة من الصبح وأنت علي لحم بطنك،
مش لاقي وقت تاكل من زحمة الشغل ،
الساعة 12 وانت الجوع بيفرتك بطنك اتصل بيك صاحبك الأكيل،
قالك عندي لك عزومة محصلتش، حعدي عليك الساعة 4 نروحوا مع بعض بعد الشغل.
أكيد فكرت دلوقتي انك بلاش تاكل علشان تعرف تضرب كويس.
اول ما قربت علي المطعم ريحة الشوي قلبت عليك المواجع،
بقي عندك شعور لغي تفكيرك في أي شيء غير الإستعداد للملحمة اللي أنت داخل عليها،
بقيت عايز تاكل أي حاجة، و أي حد حتي لو صاحبك نفسه.
(ده هو الجوع hunger)
دخلت ضربت الكفتة، الطرب، الموزة الضاني، الملوخية، السلطات، الورق اللي علي السفرة، الكراسي
و ضربت معاهم صاحب المحل لحد ما بقاش فيه خرم ابرة في معدتك للنفس.
( ده هو الشبع satiety)
وصلت البيت لقيت مراتك عاملة صينية بسبوسة بالقشدة اللي أنت بتحبها ،
حسيت برغبة انك تاكل منها حتة ع الماشي و هي سخنة
( دي بقي الشهية appetite)
اللي بيتحكم في الجوع والشبع بيبقي حاجة الجسم للطعام، نقص مكونات الطعام،
خلل في عملية الهرمونات اللي بتخلي المخ يطلب منك الأكل أو يجبرك تتوقف عن الأكل لما يستكفي.
الشهية في الغالب بيدخل فيها جزء نفسي،
السكريات المصنعة، الفراكتوز، المعجنات والمخبوزات بتحفز مركز المكافأة،
يفرز الدوبامين فيسلطنك و يكيفك كأنك ضارب جوان مغربي فخيم.
ده بيخلي الميل لأكلات معينة أو بعض الفواكة عالي،
ده كمان اللي بيخليك تحس بزهق و ساعات صداع أول ما تقرر الامتناع عن تناول السكريات دي.
وأنت في الكيتو دايت بيقل عندك احساس الجوع علشان عدة عوامل
أهمها:
عدم ارتفاع مستوى الانسولين بعد الأكل لإن زي ما أنت عارف ان افرازه معتمد علي نوع الأكل والكربوهيدرات أكتر شيء بيحفز الإفراز ده .
الدهون والبروتين اللي في الكيتو بيحفزوا افراز هرمونات الشبع
زي هرمون الكلوسيستوكاينين CCK، اللي الكربوهيدرات ملهاش اي تأثير عليه،
كمان هرمون البيبتايد واي واي peptide YY، و حتي هرمون GLP1.
وبالتالي بتشبع أكتر لما تبطل تاكل كربوهيدرات.
طب بالنسبة للشهية؟
ثابت بكذا دراسة ان جسيمات الكيتون ketone bodies بتقلل الشهية،
و دي بتحصل حتي علي ارتفاع بسيط في مستوي الكيتون 0.5 بس.
ايه دليلك؟
1- دراسة سنة 2011 ، لما حطوا بعض الناس علي نظام غذائي قليل السعرات قليل الدهون ، لقوا ان هرمونات الجوع فضلت عالية اكتر من سنة،
نفس الفريق البحثي عمل دراسة في 2013 المرة دي كان النظام قليل السعرات زي الأول بس كيتوجينك.
لقوا ان هرمونات الجوع مزاديتش ولا زاد الشعور به رغم الانخفاض الشديد في السعرات.
( يعني الموضوع مش بس سعرات أهو)
أكيد بقي طالما مش جعان مش حتاكل كتير، و حتستهلك سعرات أقل و تخس، صح؟
مش صح قوي لإن مين اللي حياكل صينية البسبوسة اللي المدام عملاها؟ ولا عايز تشوف البوز الغبي؟ 😃😃
فعلاً جايز تكون مش جعان بس الشهية بتذل رجالة بشنبات و تخليك تاكل لمجرد المتعة.
2- بعض الدراسات بتأكد مستوي 0.5 من الكيتون في الدم كافي لمنع الجوع و تثبيط الشهية،
حتي قالوا ان مفيش فرق بين لما يكون المستوي 0.5 أو 3 ملي مولز.
علشان كدة الكيتو حق والحق أبلج فلا تستوحشوا طريق الكيتو لقلة سالكيه.
حارب السمنة لأنها لا تكف عن محاربتك.
#حاصر_جيناتك_لا_مفر
