كيف تعرف جسمك في حالة الكيتوزيس ؟

الإجابة البسيطة قيس مستوي الكيتون في الجسم .

احنا عندنا 3 أنواع من اجسام الكيتون، كل نوع بيتقاس بطريقة مختلفة عن الآخر،

 

البيتا هيدروكسي بيوترات ( BHB) بتتقاس مستواها في الدم عن طريق جهاز زي جهاز قياس السكر بالظبط.

الأسيتواسيتا ت acetoacetates بتخرج مع التنفس فبتتقاس مستواها عن طريق جهاز بتنفخ فيه .

والتالت الأسيتونacetone  وده بيخرج مع البول و بيتقاس عن طريق البول.

 

في الآخر كل الطرق تنفع تقيس الكيتون، لو عندك امكانية تقيسهم، كلهم بيقولولك ان فيه كيتون عالي في جسمك.

 

طيب هل علو الكيتون دليل انك ماشي صح علي الكيتوجينك دايت؟

 

الحقيقة السؤال ده صعب نجاوب عليه اجابة بسيطة لإن فيه حاجات تانية ممكن ترفع الكيتون في الجسم زي مثلاً بعض الأمراض اهمها السكر،

الأمراض المتعلقة بتخزين الجلاكوجين، زي القيء المستمر ، شرب الكحوليات أو حتي الصيام.

 

وبالتالي ممكن تكون بتخش في حالة ارتفاع الكيتون( ketosis)

و لكن جسمك مازال لا يعتمد علي الكيتونات كمصدر للطاقة

Not keto adapted

 

 

وده بيحصل مع ناس كتيرة بتبدأ صيام متقطع علي طول مع الكيتوجينك دايت و مش بتاكل دهون كافية

و بتقلل من الأكل فبتخس طبعاً وتلاقي كيتون لانها في حالة

Starvation ketosis

مش nutritional ketosis

 

 

و لما وزنها يثبت او يرجع وزنها يزيد فيلوموا الدايت وحشة،

والحقيقة انهم لم يعرفوا الكيتوجينك دايت كما يعرف المريد مريده.

 

طيب هل اللي علي الدايت لازم يقيس مستوي الكيتونات؟

لا مش لازم فيه حاجات تانية تقدر تقولي اني في حالة nutritional ketosis من غير ما اقيس نسبة الكيتون.

ناخدها واحدة واحدة :

 

1- اعراض الكيتو فلو keto flu

 

دي اعراض بتحصل لما يبدأ الكيتون يعلي في الجسم،

بيبقي المخ والانسجة لسه مبدأتش تستخدمه في مرحلة تحويل الجسم من حرق الجلوكوز الي حرق الدهون،

دي اعراض كتيرة اهمها :

الغثيان، الصداع، الهمدان، الضعف العام، شد العضلات، التبول الكتير، ضربات القلب السريعة وكمان ممكن يطلع طفح جلدي.

 

الاعراض دي بتختلف من فرد للآخر في ظهورها او ظهور بعضها،

كمان في قوتها، بتعتمد علي عوامل كتيرة وفيه طرق للتقليل منها

 

 

2- حالة التعود keto adapted state

 

و هنا المكنة بدأت تطلع قماش، والف مبروك كان عندك كيتو فلو وراح.

بتحس بتحسن ملحوظ في صحتك العامة ، طاقة جسمك بتزيد،

بتبدأ تبقي اكثر نشاطا، جسمك بيخس بمعدل كويس.

 

دي فعلاً مرحلة كائن الكيتو البرنس، اللي قاعد يحرق في دهون طول الوقت حتي و هو نايم ،

مش بيجوع و معندهوش اي رغبة في تناول السكريات ولا فيه شهية اصلاً.

 

اغلبهم في مرحلة كائن الكيتو البرنس بيبقوا بدأت نظرتهم للأكل تتغير،

بدأ يركز علي القيمة الغذائية فيه اكتر من الطعم و بدأ يبص للكارب في كونها أساس كل كرب 😃

ويبقي الكائن الكيتو برنساً و في حالة اتزان مع النظام الكيتوجينكي ما لم تؤثر عليه قوة خارجية لإخراجه من الكيتو .

                                                                                                   

 

3-قياس الأنسولين والسكر 

 

المعروف ان تقليل الكربوهيدرات او منعها بيقلل الانسولين و يقلل السكر في الدم ،

كمان زيادة الكيتون في الجسم حيقلل السكر الصائم،

فلو قست معدل سكرك الصايم ولقيته قليل عن الحد الأدنى يعني اقل من 70 مج او اقل من 4 ميليمولز يبقي انت في كيتو.

 

طيب أنا جبت الجهاز بتاع الكيتو، اعرف منين ان النسبة دي هي المطلوبة في حالة الكيتوزيز

Nutritional ketosis?

 

 

بص لو أنت بتاكل كربوهيدرات، يبقي الطبيعي ان لما تعمل تحليل الكيتون تلاقيه اقل من 0.3 أو غالباً بتبقي زيرو.

طيب لما بتدخل في كيتوزيز بتبقي النسبة أكتر من 0.5.

 

أي نسبة اكتر من النص فحضرتك في كيتوزيز، فيه ناس قالت ان النسبة الصحية تبقي من

1.5 الي 3، و فيه دراسات بتقول انه صعب ال nutritional ketosis يزيد عن 3،

 

لكن التجربة العملية بتقول ان فيه ساعات الكيتون بيوصل ل 7 و ل 8 و الإنسان عايش كويس،

أنا نفسي قعدت فترة طويلة رافع الكيتون من 6 الي 7 لما كنت بشرب bullet proof . و صحتي زي الفل.

 

 

المهم هل كل ما زاد الكيتون في القياس معناه ان الجسم بيستخدمه أفضل ؟

 

الحقيقة الأمور مش بتتحسب كدة إحنا مش في مسابقة ketone good talent،

اللي يجيب اعلي يفوز، العكس تقريباً هو اللي صحيح.

 

ازاي؟

 

مش كل الاجسام بتقدر تحرق الكيتون بنفس الكفاءة و بتالي لو زاد الكيتونات في الجسم يبقي استخدام الجسم اقل من اللي بيقدر يستخدم كتير.

 

مثلاً فيه تفتيش رخص في الطريق ،

لو الظابط بيفوت الناس و بيمشي العربيات بسرعة يبقي مفيش عربيات حتتكدس قدام نقطة التفتيش

إنما لو رخم يبقي حيكدس العربيات و حتعدي ببطء.

كذلك الجسم لو استخدم كيتوناته بسرعة مش حيتكدسوا و لو مستخدمهومش حيتكدسوا.

 

 

الخلاصة

 

1- فيه فرق بين ان يزيد مستوي الكيتونات في جسمك و بين انك تكون keto adapted

 

2- معيارك الحقيقي لنجاح الكيتو دايت انك جسمك صحياً يتحسن عليها،

كفاءته تزيد ووزنك يخس مش مستوي الكيتون خالص

 

حارب السمنة لانها لا تكف عن محاربتك.