الرئيسية » السمنة و أشياء أخرى » نعمل إيه علشان نخس ؟

نعمل إيه علشان نخس ؟

share this :

الموضوع ببساطة ناكل أقل و نتحرك كتير. 


طيب ناكل أقل إزاي؟

وأنت عارف إن الأكل متاح في كل حتة و برضه أبسط حقوقنا إننا نشبع؟

 

أغلب المتخصصين في التغذية العلاجية بيعطوك نصائح tips ازاي تقلل أكلك،

بعض الحاجات دي مجرد كلام تنمية بشرية لإن تطبيقها بيبقي صعب بس فيه حاجات كتير اوي منها ممكن تفيدك.

مثلاً لما يقولك متروحش تتسوق وأنت جعان أو متاكلش في مطاعم برة البيت ؟ 

مثلاً مستحيل المدام تقولك هات كذا وكذا وأنت راجع وأنت تقولها لا اتغدي الأول و بعدين اروح أجيب لإني قريت ان المفروض و ماروحش السوبرماركت وأنا جعان،

متخيل ممكن يحصل فيك ايه ساعتها ؟!

أو واحد بيشتغل في مكانين و عنده نص ساعة فاضية بياكل فيها جوة المواصلات و يجي دكتور التغذية يقوله متاكولش برة البيت . 

بعضهم بينصح انك تمضغ كويس الطعام عن طريق انك تعد من 1- 20 مع كل قطمة بتمضغها علشان تاكل ابطأ

و بالتالي التنبيه بتاع الأكل يوصل للمخ فتحس بالشبع أسرع،

و أنت ما أكلتش كتير بس برضه ده كلام غير عملي،

انا عايز أكل حضرتك مش داخل حصة تسميع حساب في مجموعة الأمل الشاملة بتاعت الأستاذ رجب

انما مثلاً نصيحة متخزنش في التلاجة حلويات ولا شيوكولاته،

و خلي كل اللي في التلاجة خيارات صحية ،

دي تقدر تعملها حتي لو ضعفت و اشتريت حلويات،

هات علي قدك و كله واللي يفضل اعزم علي غيرك بيه و متشلهوش في البيت.

علشان مطولش.

 

فيه 4 طرق أساسية علشان تأكل قليل :

1- تقلل الكمية في كل وجبة

مثلاً 
– تستعمل طبق و تحط فيه كل الأكل اللي عايز تاكله و متاكلش غيره. 

– بدل ما تشرب عصير أو بيبسي تبلع به، اشرب ميه أو حتي استبدل المشروبات السكرية العالية السعرات بأخرى قليلة. 

– انك تحط نص الطبق اللي حتاكله سلطة و خضروات طازة 

– انك تاكل البروتين و الدهون الأول و في آخر الأكل كل الكربوهيدرات. 

– انك تحط الأكل اللي أنت مخطط تاكله في الأول و بعدين شيل منه ربع الكمية متاكلهاش. 

– انك تشارك حد في الأكل، تعزم علي حد يشاركك في الطبق 

– انك تشرب ميه قبل الأكل بنص ساعة حيخليك تدخل علي الأكل مش جعان. 

– وأخيراً انك تاخد ادوية تقلل الشهية . 


2-
تقلل عدد الوجبات 

احنا بننصح اغلب المرضي ( إلا حالات بسيطة) انهم ما ياكلوش بين الوجبات،

يعني 3 وجبات فقط و مفيش سناكس. 

دي طبعاً له فايدتين الأولي بتقلل الكالوريز اللي في اليوم بتاعت السناكس

و خصوصاً ان اغلب السناكس دي بتبقي غير صحية شبسيات و شيكولاتات و حاجات عالية الأملاح. 

التانية ان مع كل أكلة الأنسولين بيرتفع تاني و طبعاً انا شرحت فكرة عمله قبل كدة و دوره في تخزين الدهون. 

ناهيك انك مش بتقدر تتحكم في الكمية اللي بتاكلها مثلاً لو حتاكل وأنت بتتفرج علي التليفزيون. 

طبعاً كذا دراسة اتعملت علي موضوع الأكل بين الوجبات ولقوا انه بيساعد علي زيادة الوزن. 

كمان احنا ساعات بننصح المريض انه يفوت وجبة من التلاتة غالباً الفطار او العشاء.

منها نقلل عدد الوجبات و منها بنطول المدة اللي فيها الجسم بدون طعام علشان يحافظ على مستوي الأنسولين .

3- تقلل المدة الزمنية اللي مسموح بها بالأكل خلال اليوم

زي ما قلنا ناكل وجبتين بينهم فاصل زمني صغير 4 ساعات و نصوم الباقي ( ده بنسميه الصيام المتقطع)

غالباً بنبدأ بصيام 18 ساعة و بتاكل وجبتين في 6 ساعات و لما تتعود بنبدأ نزود مدة الصيام و نقلل المدة بين الوجبتين و ساعات وجبة واحدة. 

فكرته ان في حالة الصيام الجسم بيحرق الجلايكوجين و بعدين يبدأ في حرق الدهون،

كمان له فايدة عظيمة ان الجسم بياكل مكونات الخلايا الميتة بتاعته وبيستعملها في الطاقة

العملية دي معروفة طبياً بالاتهام الذاتي autophagy 
(اللي اكتشفها أخد نوبل في 2016).

4- تقلل خيارات الأكل المتاحة.

دي بقي الفكرة الأساسية بتاعت كل الريجيمات علي الإطلاق.

كل رجيم بيفرض ممنوعات المفروض متاكلهاش لما تنفذ الرجيم ده restrictions 

الممنوعات دي ساعات مش بتكون فيها ضرر عليك صحياً،

زي انه يقولك ممنوع الألبان، الجبن، النشويات، السكريات…. الخ

 
بس الفكرة لما أقلل الخيارات المتاحة لك، مش حتقدر تاخد كل السعرات بتاعتك من مصدر واحد او مصدرين،

ببساطة حتاكل كمية أقل و حتزهق بعد فترة من أكل نفس الأصناف فالشهية حتقل. 

انما لما اقول كل ما يحلو لك ، حتنوع في الأصناف وحتبدع في كل وجبة بالجديد والغريب والعجيب في مطابخ العالم كله و بالتالي حتاكل كتير.

طيب ان شاء الله نبدأ بعد رمضان. 

ليه بعد رمضان؟؟  ممكن من انهاردة تبدأ،

أنت طبيعي مقلل عدد الوجبات و مقلل المدة بينهم و بتصوم صيام متقطع،

يبقي لو ما أكلتش أكتر من احتياج جسمك فأنت حتخس كتير جداً، 

متخفش من الجوع، لإنك بتاكل كربوهيدرات و دي بتجوع اصلاً،

فلما حتشيلها حتققل السعرات الحرارية و مش حيزيد الجوع. 

طيب السؤال المعتاد. 

أنت متأكد من الكلام ده؟ 

أيوة يا فندم، كذا دراسة اتعملت بتقول ان الأغلب بيخس في رمضان و بيزيد بعده تاني – لانه محافظش علي نفس النظام الغذائي -.
الأطباء بيقولوا رمضان فرصة عظيمة للإنقاص الوزن بس لإنك مش بتغير عاداتك الصحية فبيرجع وزنك يزيد. 


طيب نعمل ايه؟ 

-بلاش تاكل سعرات مش محتاجها.
– بلاش تاكل بين الفطار والسحور
– قلل كمية الرز والعيش علي قد ما تقدر و زود مكانها بروتين وسلطة خصوصاً في السحور 
-اشرب كوبايتين ميه كل ساعة بين الفطار والسحور
-امشي شوية بعد الفطار
من الآخر اتحكم في رغبة الأكل لمجرد المتعة و كل حاجة حتتظبط .
و متنساش حارب السمنة لانها لا تكف عن محاربتك ورمضان كريم 

share this :

عن admin

د.محمد الصباغ . طبيب مختص غدد صماء و سكر. بالمملكة المتحدة .. زميل الكلية الملكية ببريطانيا MRCP UK حاصل على شهادة الاختصاص العليا في الغدد الصماء والسكر من الكلية الملكية. SCE endocrinology and diabetes مهتم بأبحاث السمنة والتغذية العلاجية كجزء من التخصص الدقيق.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *