الرئيسية » الكيتوجينيك دايت » حالة الكيتوزيس

حالة الكيتوزيس

share this :

حالة الكيتوزيز مش الوضع ال default للجسم،

دي حالة الجسم بيدخل فيها للطوارئ لما ميلقيش الأكل متوفر،

المفروض الجسم محتاج الحالتين، الأكل و الصيام،

وقت الرخاء ياكل و يبشبش علي نفسه و يشيل الباقي دهون،

لما الدنيا تدور وشها و يحصل نقص في الطعام، يبدأ يطلع من المخزون.

الجسم عامل زي الفلاح اللي معتمد علي أرضه كمصدر دخله الوحيد.

لما يجمع المحصول و يبيعه، يشتري هدوم و يجدد البيت و يحوش الخزين،

لحد ميعاد جمع المحصول اللي بعده، لإنه عارف كويس ان مفيش فلوس حتيجي غير علي ميعاد الزراعة اللي جاية.

احنا بنستغل حالة الكيتوزيز في علاج السمنة لانها الحالة اللي الجسم بيقدر يطلع من المخزون عنده .

بما إن السمنة حالة وفرة في التخزين، يبقي العلاج تطويل المدة اللي يقدر الجسم يحرق فيها مخزونه.

بس الجسم حريص، عنده خبث الفلاحين 😃😃، محدش يكره الفلوس أكيد،

وبناء عليه اي لحظة ما بيلاقي جلوكوز حيرجع لحالته الطبيعة ويطلع من الكيتوزيز.

ليه الجسم بيعمل كدة، لان الجسم غير قادر علي تخزين الجلوكوز بنسبة كبيرة ( 2 كجم علي الاكثر) ،

لكنه قادر علي تخزين الدهون بأي نسبة غير محدودة ( أطنان يا فندم والله 😃😃😃)

فالجلوكوز بالنسبة للجسم زي بضاعة مدة صلاحيتها للاستهلاك صغيرة

لازم يتخلص منها بدري بدري بدل ما تتركن ع الرف و تعفن،

انما الدهون بضاعة بتتخزن لسنين طويلة فالبياع علي مش مستعجل على بيعها

و بالتالي افضله يخزنها لوقت عوزه و يتصرف بسرعة في الجلوكوز.

طيب مهو كدة لو قللنا السعرات الحرارية حتي لو أكلنا كربوهيدرات،

الجسم حيخلص الجلوكوز و يحرق الدهون المتخزنة؟

الحقيقة الكلام ده نظرياً صحيح و لكن علمياً اثبت فشله مع 80% من الناس.

ليه؟

لو قللت السعرات وانت بتاكل كربوهيدرات، الدهون برضه حتتخزن،

ولكن لما الجلوكوز يقل ، المفروض تتحرق،

بس ده مش بيحصل لارتفاع نسبة الانسولين في الدم، اللي بيمنع حرق الدهون،

كمان المخ بيفهم انه محتاج جلوكوز تاني، فبتجوع أكتير و جسمك يجبرك تاكل و مش حيطلع من المخزون.

الجلوكوز ده زي الفلوس في المحفظة،

والدهون زي الفلوس في البنك،

سهل تطلع الفلوس من المحفظة و كل ما تخلص بتحاول تحط فيها تاني علشان دي اللي بتسعفك .،

انما علشان تطلع الفلوس من البنك، الموضوع محتاج وقت مجهود،

تاخد رقم و تستني دورك، تقف على الشباك و مدام عفاف تبيع و تشتري فيك قبل ما تديك فلوسك 😃😃

هي كدة بالظبط، سهل لما الجلوكوز يقل طالما الجسم معتمد عليه يزود احساسك بالجوع علشان تاكل،

انما علشان تحرق الدهون لازم يقل الانسولين.

و ازاي يقلل الأنسولين و الجسم معتمد علي الكربوهيدرات؟

الكيتو هو الحل.

share this :

عن admin

د.محمد الصباغ . طبيب مختص غدد صماء و سكر. بالمملكة المتحدة .. زميل الكلية الملكية ببريطانيا MRCP UK حاصل على شهادة الاختصاص العليا في الغدد الصماء والسكر من الكلية الملكية. SCE endocrinology and diabetes مهتم بأبحاث السمنة والتغذية العلاجية كجزء من التخصص الدقيق.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *