ممنوعات و مسموحات الريجيم الكيتوني

كتبت : هاله سراج الدين

 

ببساطة كدة وبدون تعقيد عاوز تبدأ كيتوجينك دايت

يبقي لازم نعرف مسموحات وممنوعات النظام بتاعنا

وده عشان نقدر اننا نطبق الدايت بشكل صح ونحقق الهدف بتاعنا منه اتباع الدايت

سواء كان الهدف علاج السمنة او علاج سكر نوع تاني او الامراض الاخري اللي بيعالجها الكيتو

 

خلينا نبدأ بالممنوعات في الكيتوجينك:

 

1. السكريات بجميع أنواعها سواء عسل ابيض او اسود والسكر ابيض او بني

حتي بعض انواع السكر الدايت (في انواع سكر دايت مسموحة هذكرها بعدين)

 

1. الفواكهة والعصائر بجميع أنواعها فيما عدا الافوكادو متاح بشكل يومي وممتاز

والفراوله والحرنكش والتوت بانواعه غير مسموح في البداية وبعد كدة بمقدار 30 جرام مرة اسبوعيا.

 

1. جميع انواع الحبوب او الغلة زي القمح والذرة والشعير والارز والشوفان والبرغل والفريك…….

 

1. البقوليات زي العدس والفول واللوبيا والفاصوليا والترمس.

 

1. جميع انواع المشروبات الغازية العادية التي تحتوي علي سكريات وسعرات عاليه.

 

1. اللبن والزبادي واللبن الرايب فيما عدا الزبادي اليوناني.

 

1. الخضروات النشوية وهي الخضروات التي تنمو تحت الارض

زي البطاطس والبطاطا والقلقاس و(الجزر يتم استخدامه بحساب خاصه في البدايه) واللفت والبسله.

 

1. جميع انواع المكرونات والأطعمة المصنعة من الدقيق والسكر.

 

1. جميع انواع اللحوم المصنعة زي اللانشون والهوت دوج وغيرها

 من المنتجات المضاف اليها منتجات الصويا ودهون مهدرجة.

 

1. منتجات الكاتشب طبعاً والصلصات والصوصات الجاهزة

 

1. بعض انواع ادوية الشرب المضاف اليها سكر وكذلك معجون الاسنان نختار انواع مستوردة

 

1. الزيوت المهدرجة وزيت النخيل.

 

1. جميع انواع الجبن المطبوخة واللي مضاف اليها دهون نباتية وزيوت مهدرجة.

 

 

  مسموحات نظام الكيتوجينك دايت الغذائي

واللي هنقسمها كالآتي:

1. الدهون
2. البروتين
3. الخضروات

 

 

اولا: الدهون والتي لها اكثر من مصدر متنوع وهي:

 

 

1. القشطة وكريمة الطبخ وكريمة الخفق (كبديل للبن كما يمكن استخدام لبن جوز الهند ولبن اللوز والبندق كبدائل ايضاً للبن).

 

1. الزبدة او السمنة البلدي.

 

1. الزبدة النيوزيلندي مثل اللورباك او روتانا او انكور.

 

1. الدهن الحيواني سواء اللية الضاني او صنام الجمال او غيره من الدهون.

 

1. زيت الزيتون البكر المعصور علي البارد ذو حموضة اقل من 0.5 او 0.8

 

1. زيت جوز الهند البكر المعصور علي البارد بنوعيه ذو الرائحة او بدون رائحة.( وهو مصدر هائل للطاقة في نظامنا)

 

1. الزيت الحارالمعصور على البارد او زيت بذر الكتان.

 

 

ثانياً: البروتينات وهي متنوعة المصادر والبدائل كثيرة وهي :

 

 

1. جميع انواع اللحوم الحمراء والبيضاء ( الضاني، البيف، البتلو. الجملي) ( الارانب)

 

1. جميع انواع الطيور (فراخ، حمام، بط. وز ، سمان، رومي).

 

1. جميع انواع الاسماك والقشريات ولكن بشرط طرق الطهي الصحية يمنع القلي واستخدام الدقيق.

 

1. البيض وده طبعاً الغذاء الاول والارخص في الكيتو ومتاح له اي طريقة طهي.

 

1. جميع انواع الجبن الصلبة الزيرو كارب او قليلة الكارب مثل (الريكفورد، البرميزان، الرومي القديم من مصدر موثوق، ايدام او فلمنك، جودة معتقة، الشيدر المستوردة الاصفر او الاحمر، الحلوم، كيري ولكن ليست بشكل يومي وايضا لبنة كيري) .

 

# بعض انواع الجبن البيضا الاسطنبولي نتاكد من مكوناتها انها من مصدر حيواني وليس نباتي .

 

#  محبي الجبنة القريش يفضل التقليل منها ومنعها في البداية ومتاح منها 50 جرام اسبوعياً مع زيادة زيت الزيتون لتعويض قله الدهون  بها.

 

 

ثالثاً: الخضروات وهي المصدر الاساسي في الدايت للحصول علي الفيتامينات والاملاح والمعادن

 

اغلبها متاح ومسموح ولكن في بعض الأنواع فيها زيادة في الكارب عشان كدة ناخد بالنا من كمية الكارب

 

امثلة للخضروات الورقية منخفضة الكاربوهيدات وكمان الانواع المختلفة متوسطة ومرتفعة الكارب مثل :

 

🌸 الجرجير {100جرام فيهم 0.9نت كارب} الرفيق الدائم معانا ناخد منه علي قد مانقدر كمصدر المغنيسيوم والبوتاسيوم.

🌸 السبانخ { 100 جرام فيهم 1.40} مصدر هايل للبوتاسيوم.

🌸 الخس { 100 جرام فيهم نت كارب 1.7}

🌸 البقدونس { 100 جرام فيهم نت كارب3}

 

🌸الشبت {100 جرام فيهم نت كارب 5}

🌸الخيار {100 جرام فيهم نت كارب 1.45}

🌸 الفلفل الاخضر { 100 جرام فيهم نت كارب 2.95}

🌸 الفلفل الاحمر {100 جرام فيهم نت كارب 4جرام }

🌸 الطماطم {100 جرام فيهم نت كارب 2.75جرام }

🌸 مشروم {100 جرام فيهم نت كارب 2.28 جرام }

🌸 بروكلي {100 جرام فيهم نت كارب 4 جرام }

🌸 خرشوف مطبوخ { 100 فيهم نت كارب 5.5}

🌸 ملوخية { 100 جرام فيهم نت كارب 5}

🌸 بامية {100 جرام فيهم نت كارب 4}

🌸 زيتون اخضر { 100 جرام فيهم نت كارب 0.5 جرام }

🌸 زيتون اسود { 100 جرام فيهم نت كارب 3 جرام }

🌸 البصل {100 جرام فيهم نت كارب 9 نخلي بالنا منه }

 

دي امثلة بسيطة لبعض للخضروات اللي معانا علشان الناس اللي بتكسل تحسب.

 

بالنسبة للمسموحات من المشروبات :

 

1. الشاي والقهوة والنسكافيه بحد اقصي ثلاث مرات يومياً وممكن اضافة الكريمة او لبن اللوز او البندق.

 

1. المياة الفوارة الزيرو كارب وزيرو كالوري.

 

1. السفن الدايت ويفضل التقليل منه ولو مضطرين مرة اسبوعيا كمية صغيرة.

 

يمكن استخدام السكر الدايت بحد اقصي 2 كيس يوميا

 

أنواع السكر الدايت المسموحه معانا :

 

الإريثريتول

 الاستيفيا

الزيلوتول

المونك فروت

السوكرالوز

أي من هذه الأنواع على شكل أقراص مش معانا

————————————————————————