الحقيقة الجسم مش محتاج ياخد من العضلات خالص في الصيام.
لان البروتين في الأساس مش بيتخزن في الجسم كمصدر للطاقة.
احنا بنخزن كربوهيدرات في صورة جلايكوجين
و دهون في صورة دهون ثلاثية
وبالتالي لما الجسم بيحتاج ياخد من المخزون بياخد من السهل الاول ( الجلاكوجين)
وده بيخلص في اول 24 ساعة و بعدين بيطلع من الخلايا الدهنية طاقته
ودي بتبقي مصدر الطاقة بقي لحد ما ينتهي فترة الصيام.
طب ايه اللي خلي الناس تعتقد ان الكتلة العضلية بتقل؟
حاجتين.
الاولي: عملية اعادة تكوين السكر في الدم اللي هي Gluconeogenisis
ودي لانها بتعتمد علي الأحماض الأمنية زي الألانين والجلوتامين،
فبعض الناس متخيلة ان الكبد بيكسر العضلات علشان ياخد الأحماض دي يبني بيها سكر جديد
و نسيوا ان عملية اعادة تكوين السكر ممكن تتم بالجليسرول ( العمود الفقري في جزيء الدهون الثلاثية و بالتالي مفيش احتياج للجسم يكسر عضلاته)
زي مثلاً انت عندك دفاية بتحتاج خشب علشان تدفي البيت.
وعندك مخزن خشب تحت بير السلم،
حتكسر أثاث البيت لما تحتاج تشغل الدفاية ولا حتاخد من المخزن؟
اكيد عمرك ما حتكسر الأثاث الا لو المخزون كله خلص.
النقطة التانية:
ان البروتين في حالة هدم و بناء يومياً و بالتالي لو ما أكلناش بروتين نعوض اللي اتكسر يبقي اكيد حنخسر من الكتلة العضلية.
الكلام ده برضه مش مظبوط.
ليه، لان الجسم فعلاً بيجدد طول الوقت انسجته ولكن في الصيام بتقل عملية الهدم،
اللي بيحصل ان الجسم بيعيد استخدام الأحماض الامنية مرة أخري في بناء الأنسجة، مش بيتخلص منها.
ازاي؟
لما بيقل الانسولين، بتزيد الهرمونات المضادة زي هرمون النمو، التستسترون والكاتيكولامينز
و دول لهم تأثير على بناء العضلات عن طريق اعادة تدوير البروتين اللي انكسر في عمليات الهدم.
طيب ساعات فعلاً الكتلة العضلية بنلاقيها قلت في جهاز الانبدي او مع حتي المقاسات العادية؟
اللي بيحصل ان داخل العضلات نفسها فيه دهون اسمها العلمي
Intramyocellular lipids
ودي لما بتتخزن الدهون كتير بتسبب مقاومة للانسولين، الدهون دي بتقل مع الكيتوجينك دايت و مع الصيام،
فبتلاحظ ان العضل قل في حجمه ولكن اللي قل فعلاً الدهون اللي مقللة كفاءة العضلة.
وللأسف الشديد جهاز الانبدي و حتي ال dexa scan متقدرش تميز بين نقص الالياف العضلية ونقص الدهون داخل العضلة.
