أكيد فيه واحد قريبك مثقف أو دكتور أول ما سمع إنك على كيتوجينك دايت، ملامح وشه اتغيرت،
وقلق جامد عليك، و بعدين قالك بصوت أبوي رخيم، ده دايت غير صحي،
ارتفاع أجسام الكيتون في جسمك غلط لأنه بيسبب حموضة في الدم و بيسبب الوفاة لمرضي السكر و له اسم علمي ketoacidosis.
وراح مجود شغله بحتة عميقة كدة و قال شايف حتي الإسم keto من الكيتون، و acidosis يعني حمضية الدم.
مش بعيد يكون نصحك تتوب، تستغفر ربك و تضرب حتة (السينابون) دي أو خد اضرب حلة المحشي دي يمكن ربنا يرضي عنك و يسامحك.
الحقيقة واحد من أكتر الأسئلة اللي بتسألها :
هل ال nutritional ketosis بيتسبب في ketoacidosis.؟؟
يعني هل الناس اللي علي الكيتوجينك دايت معرضين للحالة الخطيرة اللي اسمها حمضية الدم الناتجة عن ارتفاع الكيتون؟
الأول خليني احكيلكم عن اتنين من الهرومونات اللي واخدين علي أكتافهم حمل عملية حرق الجلوكوز والدهون.
1- الأنسولين Insulin
ده بيتفرز من خلايا اسمها (بيتا) في البنكرياس، مهمته انه بيحافظ علي مستوي السكر في الدم انه ميرتفعش عن حد معين،
عن طريق بيدخل الجلوكوز الخلايا للإستفادة منه كمصدر للطاقة،
بيخزن الباقي علي شكل (جلايكوجين) في الكبد والعضلات – عبارة عن سكر معقد زي (النشا) اللي بتخزنه النباتات –
لو اتفضل جلوكوز بيحوله لدهون و يخزنها في الخلايا الدهنية لوقت الحاجه.
كمان بيمنع حرق الدهون علشان الخلايا تحرق جلوكوز بكفاءة عالية، و بيمنع تحويل الدهون الجلوكوز
Gluconeogenesis. بالتالي بيزود مخزون الجسم من الدهون .
2- الجلوكاجون Glucagon
وده برضه بيطلع من خلايا اسمها( ألفا) في البنكرياس
و مهمته انه يحافظ على مستوي السكر في الدم مينزلش عن حد معين عن طريق انه بيحفرز تحويل الجلاكوجين glycogen المتخزن في الكبد إلي جلوكوز ، كمان بيحول الدهون إلي جلوكوز،
بيحسن تحلل الدهون lipolysis و يطلع منها الأحماض الدهنية علشان تتحرق و تكون الكيتونات اللي بتعتبر مصدر للطاقة في غياب الجلوكوز.
بإختصار :-
فيه اتنين من الهرمونات بيتفرزوا من البنكرياس،
بيتحكموا في عملية التمثيل الغذائي و طريقة عملهم ضد بعض.
بس يا تري ازاي بتتحدد طريقة عملهم دي؟
المعروف ان الأنسولين هو( الريس) big boss طول ما هو عالي الجلوكاجون glucagon و معاه أزيد من ست هرمونات تانية بيفضلوا في جحورهم مذعورة و خايفة منه، بس أول ما الأنسولين يقل بيبدأ الجلوكاجون ينفش ريشه و يشتغل.
عملياً حضرتك لما بتاكل، الأنسولين بيعلي،
يستقبل الجلوكوز علي باب الدم يدخله الخلايا والمخ ، يخزنه في الكبد والعضلات و يحول الباقي منه لدهون.
و هو منهمك في الشغل ده يلمح بطرف عينه الدهون مستنية دورها،
يبص لها بإحتقار و يقول في سره :- أنا ناقصكم مش كفاية بلوة الكربوهيدرات عليا.
يبتسم من تحت ضرسه و هو بيفتح باب الخلايا الدهنية علشان يخزنها.
لما يطمن أن السكر مستواه قل، يبدأ ينزل لمستواه الطبيعي….
ساعتها (الجلوكاجون) يحس بنزوله يبدأ يطلع من جحره عشان يعيش حياته،
يحلل (الجلاكوجين) المتخزن، يحول الدهون لسكر، يحرق الدهون علشان تبقي مصدر بديل للطاقة
( سواء بقي وهي أحماض دهنية fatty acids ولا جسيمات كيتونية ketone bodies)
أكيد حضرتك دلوقتي لاحظت ان لما تاكل كل ساعتين (سناك)
دي حاجة مش صحية لإن معناه أن الأنسولين حيفضل عالي علطول و حيخزن الدهون طول الوقت.
كمان لاحظت كل ما الفترة بين الوجبات تطول،
كل ما الفرصة حتزيد قدام الجلوكاجون glucagon انه يحرق السكر المتخزن والدهون.
في حالة الكيتوجينك دايت، بنحاول نقلل الكربوهيدرات الي الحد اللي يسمح بتقليل الأنسولين فنحفز افراز الجلوكاجون glucagon و نزود مسار الحرق.
وفي حالة السكر من النوع الأول type 1DM اللي ناتج عن عدم افراز الأنسولين بسبب تآكل خلايا( بيتا) في البنكرياس، بيحصل نفس العملية، عدم وجود الأنسولين بيدي الفرصة قدام (الجلوكاجون) وأخوته يبرطعوا و يطلعوا الكيتون بدون حاكم ولا رابط.
طب ليه في الكيتو دايت الفرد بيحس بتحسن في صحته بينما في حالة السكر من النوع الأول و بعض الحالات الأخري بيتحول الي حالة مرضية خطيرة و حموضة بالدم؟
الفرق بسيط، في حالة الكيتو دايت بيبقي البنكرياس طبيعي و بالتالي بيفضل يفرز أنسولين طول الوقت بحد كافي لمنع الكيتون من تكوين حمضية الدم acidosis
بينما اختفاء الأنسولين من المعادلة بيخلي الكيتونات تزيد ولأنها ذات طبيعة حمضية acidic فبتسبب حمضية الدم acidosis و من هنا جه إسم ketoacidosis.
( زي ما قريبك المثقف قال 😃)
الخلاصة،
لو أنت بنكرياسك سليم يبقي الأنسولين بتاعك بيتفرز طول الوقت
و ده اسمه basal insulin و بيتفرز كاستجابة للطعام و ده بيسمي prandial insulin.
في الدايت احنا بنحاول نقلل استجابة الأنسولين للطعام
و بالتالي بيفضل كمية من الأنسولين كافية انها تمنع حدوث حمضية الدم ketoacidosis طول الوقت.
طيب هل احتمال يحصل ketoacidosis بسبب الدايت؟
فيه حالات اتسجلت حصلها ketoacidosis بسبب الدايت بس دول ستات كانت بترضع، علشان كدة بننصح الحوامل والمرضعات ميعملوش كيتوجينك دايت.
لو حصل ketoacidosis وأنت علي دايت غالباً أنت عندك سكر من النوع الأول
مكنش متشخص و غالباً الكيتو دايت في الحالة دي ملهوش ذنب.
حارب السمنة لانها لا تكف عن محاربتك
