منظمة الصحة العالمية بتقول في تقريرها سنة 2015 ان معدل التدخين قل بنسبة كبيرة بعد فرض الضريبة،
مثلاً في الولايات المتحدة لما زادت الضريبة 10% بس، قل احتمال الاصابة بسرطانات الرئة 1.5% و دي حاجة كبيرة،
التقرير ده بيحتوي علي معلومات كتيرة بتأكد نفس الفكرة في دول كتيرة فرضت فيها ضريبة علي التدخين.
أنا شايف ان بالرغم من التشابه الكبير بين التدخين والسمنة كظاهرتين مسببتين لأغلب الأمراض والسرطانات،
منتشرتين في كل مكان الدول بتدفع مبالغ كبيرة في علاج الأمراض المصاحبة لهم علي سبيل المثال الولايات المتحدة بتدفع حوالي 150 بليون دولار لعلاج الأمراض المصاحبة للسمنة و الرقم ده في ازدياد كمان،
إلا أن السيطرة على التدخين أسهل بكتير من التحكم في السمنة و علاجها وده راجع لأسباب كثيرة
أهمها :
1- السمنة مرتبطة بواحد من أقوي الدوافع الفسيولوجيه المبقية علي الحفاظ على النوع و هو الطعام، غير التدخين اللي علي أسوأ الفروض مجرد ادمان للنيكوتين ناتج عن عادة سيئة.
بالتالي وعينا الجمعي ان التدخين سيء بس الإفراط في الأكل مفهوش مشكلة، حتي في المجتمعات المحافظة زي الأرياف عيب لما تدخن قدام أبوك أو حد أكبر منك إنما مثلاً مش عيب لما تضرب حلة محشي أو صنية بطاطس قدامه.
2- الأكل مرتبط بمركز المكافئة بالمخ، مصدر بهجة لكل الأفراد، المناسبات الاجتماعية مبتحلاش الا بالطعام، ده بيخلي الانسان اللي عايز ياكل صحي عايش في عزلة و بيقاوم كتير. عكس اللي عايز يبطل الدخان، حتي المدخن اللي لسه مبطلش بيشجعه في أغلب الأحيان.
3- دايماً ما عدا حالات فردية المدخن غير راضي عن نفسه و بيجي عليه لحظات كتيرة عايز يبطل، عكس اللي وزنه بيزيد بيبقي راضي عن جسمه في أغلب الأحيان و معندهوش استعداد يقلل كمية الطعام اللي بياكلها.
مثلاً عملوا دراسة لقوا ان تقدير الأفراد للوزن أقل من الوزن الفعلي بحوالي 10 الي 20 كيلو، يعني لما بتسأل واحد صاحبك توقع وزني كام حيقولك مثلاً 80 كيلو غالباً وزنك الفعلي حيبقي من 90 الي 100 كيلو.،
ده بيخلي فيه صعوبة في فهم دوافع الفرد اللي عايز يخسر وزنه لإن المجتمع شايفه مش محتاج لكل ده
4- ضريبة التدخين مش هي العامل الوحيد وراء قلة استهلاكه فيه حاجات تانية أهمها قرار منع التدخين في الأماكن المغلقة، المواصلات العامة، المطارات، المستشفيات، الخ.
الفرد المدخن مش بسهولة يقدر يدخن فبالتالي استهلاكه بيقل غصب عنه، انما تقدر تاكل في أي مكان، بالعكس مفيش مكان مينفعش تاكل فيه أو ممنوع اصطحاب المأكولات والمشروبات إلا في المكان اللي بيوفروا أكل جواه .
بإختصار لازم نظرة المجتمعات تتغير نحو الأكل زي ما اتغيرت تجاه التدخين .
5- مشكلة السمنة معقدة مش بس فرض ضريبة أو تناول أكل صحي ممكن يحلها، مش حنقدر نمنع سهولة الوصول للطعام في كل مكان، مش حنقدر نمنع وسائل المواصلات الأكثر سهولة، السمنة عبارة عن التأثير الجانبي للمدنية الحديثة و التطور التكنولوجي.
في النهاية
هل ممكن نلاقي أم بتزعق لراجل في اتوبيس بياكل شيوكولاته جنب ابنها الصغير و خايفة ان ابنها يقلده.
هل ممكن نسمع فتوي بعدم جواز تناول ال junk food
ونلاقي عنوان في الصحف زي ال big Mac حرام شرعاً.
هل ممكن نلاقي غرامة علي تناول البيبسي في مكان عام.
أكيد حضرتك بتقول ده مستحيل مع انه حصل مع التدخين.
بس فيه خطوات تانية بتحاول الدول تعملها مثلاً،
بعض الدول زي ايرلندا الجميلة ممنوع علي الأطفال في بعض المدارس اصطحاب أي حلويات أو أكل مصنع الا صنف واحد في وجبة غذاء يوم الجمعة.
كمان فيه في اوروبا في أغلب المؤسسات حملة
Cycle to work
بتدعم الموظفين للذهاب للعمل عن طريق ركوب العجلة بدل الموصلات، منها نقلل الزحام، استهلاك الوقود، نحافظ على البيئة كمان نحسن الصحة ونحارب السمنة.
بتوقع ان المكن اللي في المطارات اللي بتاخد منه البيبسي وال snacks يتغير لخيارات صحية.
المشكلة ان شركات الغذاء و المشروبات الغذائية بتحارب بكل قوتها وطبعاً مع الإعتذار لعمنا أمل دنقل
من يملك ( الرز) يمسك بالوجهين، و العلماء بين بين.
#حاصر_جيناتك_لا_مفر
ده لينك بتاع ال who للي عايز يطلع اكتر
http://www.who.int/bulletin/volumes/94/4/15-164707/en/
ده لينك لدراسة جميلة عن تعديل جينات مركز المكافئة في المخ لتقليل السمنة
https://www.ncbi.nlm.nih.gov/pmc/articles/PMC3124340/
