ما هو الكيتو دايت

يعني ايه كيتو؟

كثيرا مانسمع كلمة كيتو او نظام الكيتو دايت وخصوصا اذا كنت ممن يبحثون عن قوام رشيق او تحاول انقاص وزنك بطريقة امنه وصحية دون التعرض للاضرار الجانبية التي تحدث نتيجة انظمة التخسيس المنتشرة

وايضا لمن يبحثون عن انظمة تخسيس فعاله دون معاناه الذهاب الي اطباء التخسيس ودون الحاجة الي تناول ادوية التخسيس مجهولة المصدر المنتشرة بكثرة

في البداية سنوصح لك معني كلمة كيتو وعلي اي اساس تقوم انظمة التخسيس

كلمة كيتو تنطق  اختصار ل ( كيتوجينك) والكيتوجينك دايت نوع من الدايت التابعة لأنظمة قليلة الكربوهيدرات.

لماذا اختار الكيتو دايت ؟

ببساطة لو عايز تعمل دايت، حيبقي قدامك كذا خيار،

يا تقلل الدهون ( انظمة قليلة الدهون low fat) ، يا تقلل الكربوهيدرات ( انظمة قليلة الكربوهيدرات low carb) ، يا تقلل السعرات ( انظمة قليلة السعرات restricted calories)

طيب إحنا ليه مش بنقلل البروتين؟

البروتين مش مصدر طاقة أساسي، عكس الكربوهيدرات والدهون، علشان يبقي مصدر طاقة لازم يتحول لجلوكوز الأول في الكبد.

بالتالي أنت مش محتاج تقلله علشان تطلع من المخزون اللي في الجسم لإنه مش بيتخزن في الجسم. حنبقي نتكلم عنه في وقته بصورة مفصلة.

يبقي الخلاصة:

 يا تقلل الدهون، ي تقلل السعرات، يا تقلل الكربوهيدرات علشان تخس.

دايماً بيرتبط تقليل السعرات بتقليل الدهون ولكن مش شرط تقلل السعرات وأنت علي نظام قليل الكربوهيدرات.

 

يعني ايه نقلل الكربوهيدرات؟

 

 

بص يا سيدي، لو أنت و معاك اتنين اصحابك كسبتوا 100 جنيه،

و حتوزعوهم بينكم، بفرض واحد منكم نزيه و قال انا عايز 20 جنيه بس و انتوا اتصرفوا في ال 80 براحتكم،

زميلك التاني طماع عايز ياخد 70 و يسيب لك 10 و أنت عنداً فيه عايز تاخد 70 و تسيب له ال 10.

نسب الأكل بتاعتك كدة

البروتين راجل نزيه قوي، في كل دايت بياخد نسبة ثابتة غالباً 20% و بيسبب الدهون والكربوهيدرات زي اللي مولودين فوق رؤوس بعضهم

لو قللت الكربوهيدرات حتزيد الدهون ولو قللت الدهون حتزيد الكربوهيدرات.

وبالتالي لما بقول قليل الكربوهيدرات يبقي معناه ضمنياً عالي الدهون، بس الأساس ان الكربوهيدرات قليلة. والعكس صحيح.

طيب ليه بنقول كيتو مش بنقول قليل الكربوهيدرات low carb ؟

الحقيقة الكيتو مختلف في نظام عمله عن باقي انظمة اللوكارب.

الأول لازم تعرف إن اللوكارب low carb

دي مظلة كبيرة بيندرج تحتها أنظمة غذائية كتيرة، بتختلف نوعها علي حسب المسموحات والممنوعات و نسبة الكربوهيدرات في كل نوع.

المتخصصين بيعرفوا اللوكارب low carb علي انه أي نظام غذائي فيه الكربوهيدرات تحت 45%.

أكيد حضرتك دلوقتي فهمت ان لازم الكيتو يبقي مختلف لإن نسبة الكربوهيدرات بتبقي 5 الي 10% علي الأكثر.

دليل المبسط لفهم الكيتو 

بس الصراحة مش ده السبب الرئيسي في التسمية دي.

السبب في تمييز الكيتو عن إخوانه من اللوكاربيين هو ان الجسم في نظام الكيتو بيعتمد علي مصدر طاقة تاني غير الجلوكوز، اللي بيعتمد عليها باقي الانظمة التانية .

اللي بيحصل في حالة عدم امداد الجسم بالكربوهيدرات ( مصدر الجلوكوز في الطعام) ، ان الكبد بيحاول ينتج جلوكوز من الدهون والبروتينات

و لإن انتاج الكبد عمره ما حيكفي احتياج الجسم، فبيستغل الدهون اللي في الطعام و بيحرق الدهون المتخزنة و يستخدمها كمصدر للطاقة.

الكيتون ده منتج من الدهون و مصدر طاقة نضيف و الجسم بيبقي عليه أكتر صحة و نشاطا.

 

References

1-https://bjsm.bmj.com/content/51/2/133