الأعراض النفسية لانسحاب السكر من الجسم
لما بطلت السجاير، كنت بحلم بيها اغلب الليالي،
ساعات كنت بحلم انها وقعت من ايدي وحرقت الفرش واقعد اطفي فيها،
اصحى مفزوع.
عرفت وقتها ان دي الأعراض النفسية لانسحاب النيكوتين
و أن الجسم بياخد فترة على ما يتعود على الوضع الجديد اللي انت حطيته فيه بدون متعة حقيقة كان يعتمد عليها.
المهم بعد فترة بدأت احلم اني بدخن سجاير تاني،
حاجة كدة زي انك تحن للـ إكس بتاعتك بعد ما ربنا أكرمها بمنة الله و عبدالله و قاعدة مع جوزها في الكويت.
الكربوهيدرات معروفة انها ادمان
و خصوصاً السكريات المصنعة السريعة، الفركتوز اقواهم.
الكلام ده مثبت بكذا دراسة على البشر والحيوانات،
فاكر انا عرضت قبل كدة دراسة أن مراكز المتعة عند مريض السمنة بتقل عن الشخص العادي،
ده بيخليه يتناول سكريات اكتر علشان يحس بنفس الدرجة من المتعة.
عملوا دراسة على الرضع
وجدوا أنهم يتوقفون عن البكاء بعد تناول المشروبات السكرية
اقوي من التقام ثدي الأم نفسه.
كانوا يستخدمون السكر كمشروب بديل للتخلص من الكوكايين
لانهم وجدوا أن له تأثير قوي كإدمان.
مشروب كوكاكولا في الأول كان يحتوي على كوكايين وسكر،
بعد منع الكوكايين منه، مبيعاته لم تتأثر لأن السكر اللي في الكوكا لسه بيعمل نفس التأثير لوحده.
ده غير دراسات كثيرة علي الحيوانات،
مثلاً وجدوا أن الفئران بتميل لتناول السكر اكتر من تناول الكوكايين
القصد
لما بتحلم بالسكريات في المنام
ده بيبقي رغبة الجسم في العودة للإدمان واللي بتظهر في اللاوعي أثناء النوم،
لما تصحي من النوم اعرف انك ماشي صح و جسمك يتعافى من الإدمان.
ولما تبقي بقالك مدة كبيرة بدون سكريات
و لسه بتحلم بده يبقي لسه حضرتك متعلق بأم عبدالله ( your X)
اكيد زي ما هو مش حل ترجع للتدخين علشان تتوقف عن الأحلام،
مش حل كمان ترجع للكربوهيدرات علشان متحلمش بيها.
سيب أم عبدالله في حالها، ربنا يبارك لها في منة الله و يفرحها بيهم
