و يبقي السؤال الوجودي مطروح دائماً.
ليه كل ما بنخس بنرجع نزيد تاني؟
كنت اتكلمت في مقال مفصل عن التفسير التطوري لظاهرة ميل الجسم انه يكتسب الوزن اللي فقده و ازاي انها صفة مهمة تطورياً وان اختلاف عوامل البيئة هي اللي أدت لانتشار وباء السمنة.
في المقال ده حتكلم عن التفسير الفسيولوجي لزيادة الوزن.
النقطة الأولي( معدل الحرق).
ببساطة مجموع الطاقة اللي بتحرقها بتعمد علي عوامل كتيرة زي السن، الجنس، المجهود البدني…… الخ
الوزن بقي عامل مهم جداً جداً في زيادة معدل الحرق، كل ما زاد الوزن زاد الحرق لإنه بيأثر علي الطاقة المفقودة وقت الراحة ( resting energy expenditure) ودي بتمثل 60% من مجموع الطاقة المفقودة كلها.
و بالتالي خسارة الوزن حيقلل الطاقة دي فيقل معدل الحرق بنسبة كبيرة جداً.
بالتالي الكمية اللي انت بتاكلها و جاي علي نفسك فيها معدتش كافية انها تقلل الوزن، مش بس كدة، الجسم لما بيلاقي الطاقة قلت بيبدأ يزود الجوع عنك علشان ترفع وزنك و بالتالي ترجع لسالف عهدك.
النقطة التانية ( الهرمونات)
أحب أعرفكم علي واحد من أهم الهرمونات المتحكمة في السمنة، هرمون اسمه اللبتين(leptin)
اللبتين ده بيسموه هرمون الشبع – حبقي اتكلم عنه بعدين بالتفصيل-، بس اللي أنا عايزك تعرفه، ان مستوي اللبتين بيعبر عن كمية الدهون المخزنة في جسمك.
ببساطة (اللبتين) هو وزير المالية اللي بيقول للرئيس عن الاحتياطي النقدي في الدولة.
معني انه يقل معناه ان الدولة في خطر و داخلة علي افلاس ، وده نذير شؤم لإن فيه اجراءات قاسية لازم تاخدها الحكومة علشان تزود الاحتياطي
( طبعاً جسمك مش بيروح يستلف من البنك الدولي)
في دراسة لفريق بحثي من استراليا،
(sumithran et al)
درسوا التغيرات في مستوي الهرمونات اللي بتحصل لما الوزن يقل علي 50 مريض بعد ما حطوهم علي برنامج غذائي للتخسيس ، لقوا ان كل الهرمونات المسئولة عن التحكم في الشهية بتتغير في الاتجاه اللي يزود الوزن.
يعني مثلاً هرمونات اللي بتزيد في حالة الشبع قلت، بينما هرمونات زي ghrelin اللي بتزيد في حالة الجوع زادت.
المذهل مش في كدة ، المذهل فعلاً موقف اللبتين leptin
مجرد ما الوزن خس 14% بس، اللبتين قل 65%، يعني بيقول للمخ اننا بنموت و في مجاعة ولازم تتصرف.
لما قريت الدراسة دي أول مرة تخيلت اللبتين
بيبكي بحرقة للمخ و يقوله
( احنا في ايد واحد مجنون، مش عارف هو بيعمل ايه؟ ، لازم تاخد موقف بدل ما حنضيع، فورمة الساحل إيه؟ ولا طقم skinny ايه؟ اللي حيضيعنا بسببه ده؟)
طبعاً تأثير الخلل ده بيفضل لحد اكتر من سنة ( اللي هي مدة الدراسة) و ممكن يطول كمان.
النقطة التالتة ( حركة الأمعاء)
ببساطة لما الأكل بينزل من المعدة و يبدأ يمتص بتبدأ هرمونات الشبع تتفرز من
( الاثني عشر)
اكتشفوا بقي في حالة خسارة الوزن، بيتأخر افراز الهرمونات دي لإن حركة المعدة بتتأخر، عكس مثلاً عمليات تغير المسار اللي بيزيد افراز الهرمونات دي نتيجة ان سرعة نزوله من المعدة للاثني عشر.
النقطة الأخيرة ( الشهية)
أكيد حضرتك دلوقتي عارف انا عايز اقولك إيه، آه كذا دراسة بتقول ان الشهية بتزيد ورغبتك في الأكل بستوحش كل ما تخس.
طب هو مفيش حل للسواد ده؟
فيه حلول طبعاً والدليل ان فيه ناس نجحت علي الدايت والرياضة بس
1- زي ما كافكا بيقول في واحدة من قصصه
(اذا أردت أن تعرف بوابة الخروج عليك أن تتعلم)
كل القصص الناجحة في الدايت، قرأت عن الدايت، بحثت عن الأجوبة لأسئلتها و فهمت تتصرف ازاي مع جسمها .
انا شايف ان القراءة هي اللي بتخلق دايماً عندك دافع انك تحافظ على الرجيم و بتفهمك ازاي تمشي صح وامته تكشتف انك محتاج تغير نظامك.
2- الدراسات بتقول ان الأنظمة قليلة الكربوهيدرات بتقلل الطاقة المفقودة وقت الراحة عن الانظمة قليلة الدهون و بالتالي فرصة انك تتخن لو حافظت على النظام بتبقي قليلة بالمقارنة ب الانظمة الأخري قليلة الدهون أو حتي قليلة السعرات الحرارية.
3- من المقولات الجميلة لبروفسيور اسمه بنجامين ليفين Benjamin Levine.
خلي الرياضة جزء من نضافتك الشخصية personal hygiene
زي ما بتصحي من النوم بتاخد شاور، بتغسل أسنانك، بتغير هدومك و بتسرح شعرك، كمان لازم تلعب رياضة، اعمل اي حاجة حتي لو تقوم من ع الكرسي و تفرد جسمك كل شوية.
حاول تزود حركتك واحدة واحدة، اخلق متعة لنفسك في الرياضة.
علشان اهمية الرياضة الفعلية مش في انقاص الوزن انما في الحفاظ على الوزن و عدم زيادته.
4- الأكل عندنا نشاط اجتماعي، فكذلك من الحاجات المهمة ان البيت كله ياكل زي بعضه، مينفعش تبقي زوجتك عاملة دايت وأنت طالب محشي، او تروح تملأ التلاجة ايس كريم و شيكولاتات علشان عيالك، الأفضل ان تغير العادات للعادات صحية يتم علي مستوي الأسرة كلها.
طبعاً في الآخر
لا تكف عن محاربة السمنة لانها لا تكف عن محاربتك
