الرئيسية » السمنة و أشياء أخرى » دليلك الشامل في حالة ثبات وزنك

دليلك الشامل في حالة ثبات وزنك

share this :

دليلك الشامل في حالة ثبات وزنك..

واحد من أكتر الأسئلة اللي بتسألها يومياً من يوم ما قررت أكتب في فهم السمنة و علاجها

( انا بعمل كل حاجة صح ومع ذلك وزني ثابت علي الميزان، ايه الحل؟)

السؤال ده بالظبط زي لما مريض يبعت يقولي انا عندي دوخة يا دكتور، إيه الحل ؟

أنا كطبيب بيبقي في دماغي الف سبب و سبب للدوخة انما المريض بيبقي عايز اجابة واحدة سريعة و ناجزة زي مثلاً

(متنامش قدام المروحة).

للأسف الشديد ثبات الوزن موضوع كبير و مهم فاعذروني اني اتأخرت في الكتابة عنه

واعذروني كمان لو تسرب اليكم الملل من البوست اثناء القراءة كما تسرب لكم الإحباط من الدايت لما حسيتوا بثبات الوزن .

تعمل ايه لو لقيت نفسك ثابت علي الميزان اكتر من اسبوعين أو تلاتة متتالين؟

لازم تفكر في الموضوع ده علي عدة مستويات، كل ما تخلص مستوي تطلع للي بعده

المستوي الأول :

{ روح راجع مفاهيمك }

بعض المفاهيم خاطئة عن الدايت في تصورك خليتك تحس ان فيه ثبات في الوزن و الحقيقة ممكن تكون بتخس من غير ما تحس

1 – بتطلع علي الميزان كل كام ساعة في اليوم الواحد بهدوم مختلفة، واكل مرة، صايم مرة، لسه مخلص تواليت مرة.

ده طبعاً غلط المفروض انك توزن مرة واحدة اسبوعياً، نفس الوقت، في نفس اليوم، بنفس الملابس.

لو الميزان عندك في البيت يبقي مثلاً توزن يوم السبت اول ما تصحي من النوم، بعد ما تخرج من التواليت ، بنفس البيجامة أو لابس حاجة أخف .

2 – بتخس دهون بس وزنك ثابت

ودي نقطة مهمة، ان مش بس الوزن العامل الوحيد اللي بيعرفك ان وزنك نزل فيه مقاسات تانية مهمة زي محيط الوسط،

حجم العضلات، نسبة الدهون في الجسم، ساعات بتزيد الكتلة العضلية و تقل الدهون فيفضل الوزن ثابت،

بس بتلاقي صحتك افضل و الهدوم شكلها احلي علي جسمك.

3- حضرتك حاطط تارجت غير واقعي للدايت

بعض الناس بتقول انا لازم اخس كل اسبوع 3 كيلو مثلاً، فيخس اول وتاني اسبوع تلاتة كيلو

و يجي الاسبوع التالت يلاقي نفسه خس نص كيلو، فيقول الدايت دي مش كويسة.

الصح إن أي نقصان في الوزن اكتر من نص كيلو في الاسبوع هو نقصان صحي،

بعض الناس كمان مش بتفضل تخس أكتر من كيلو جرام في الأسبوع لو أنت بتضطر تقلل السعرات الحرارية علشان تحقق ده ( وأنا من الناس دي) انما لو بتخس وانت شبعان يبقي خلاص.

4 – حضرتك بتقارن نفسك بغيرك.

كل جسم حالة فردية مختلفة عن غيره، وحدة مستقلة لها خصوصيتها، و هرموناتها، ومعدلات الحرق الخاصة بها، واللي بتختلف تماماً عن غيرها.

علشان كدة اللي عايز يخس 6 كيلو بس من وزنه غير اللي عايز يخس 40 كيلو،

و الست متقارنش نفسها بالراجل،

و اللي طول عمره بيحاول يخس و يرجع يزيد ميقارنش نفسه باللي اول مرة ياخد موضوع الدايت بجدية،

واللي اكتسب الوزن في اول حياته، غير اللي وزنه زاد الكام شهر اللي فاتوا .

المقارنة غير عادلة و فيها ظلم شديد لنفسك و ممكن تأثر بالسلب عليك،

لازم تتقبل استجابة جسمك البطيئة، و متقارنهوش بغيره.

5- وزنك منزلش أصلاً.

الناس اللي لسه بادئة دايت و مكملتش شهر وحاسة الوزن ثابت .. دي أكيد عندها مشكلة في تطبيق الدايت،

و ممكن ما تكونش دخلت في الكيتوزيز اصلاً او بتدخل و تطلع علي طول.

انما لو أنت بقالك اكتر من 3 شهور و حصل ثبات في الوزن فده فترة الجسم بيدافع فيها عنه نفسه من الصدمة اللي حصلتله في تغيير نظامه الغذائي، بيبدأ يقول لنفسه (الراجل ده بيعمل فيا إيه 😃😃) .

زي الطفل المولود شعره مش بيقع إلا بعد مدة من خروجه من الرحم لما بيكتشف انه خرج من طور الراحة اللي الاكل بيوصله من المشيمة ع الجاهز و دخل الي الدنيا القاسية اللي بيضطر يمص و يتعب علشان يغذي نفسه 😭😭.

بدون فلسفة ثبات الوزن لما بيحصل بعد اكتر من 3 شهور بيبقي جزء من البلاتوه بتاع الدايت فمتقلقش .

المستوي التاني

{في البدء كان الطعام}.

فيه حاجات بتعملها في الدايت نفسها بتكون سبب في ثبات الوزن.

1- حضرتك بتاكل وأنت شبعان علشان لازم تكمل نسب الماكروز.

زي ما بتحس بالحاجة للنوم فبتروح تنام لحد ما تاخد كفايتك و تصحي،

زي لما بتعوز تشرب بتروح تشرب لحد الارتواء، زي أي دافع فيسيولوجي بتلبيه، ليه فيه كلكعة مع دوافع الأكل ؟

الكيتوجينك دايت ميزتها (من وجهة نظري الشخصية) انها بتعيد برمجة مخك و تحسن استجابته لهرومونات الجوع والشبع،

عن طريق بتقولك لما تجوع كل لحد ما تشبع ولما تكون شبعان متاكولش،

زي ما انت مش بتنام ساعتين استخسار يبقي ما تاكولش استخسار،

لما تاكل وأنت شبعان بتضيع علي نفسك اكبر فضيلة للكيتو دايت و هي فضيلة الصيام المتقطع.

علشان كدة لما تبقي شبعان كمل صيام حتي لو طولت يومين و تلاتة طالما شبعان المهم تكون بتاخد املاح الصوديوم، الماغنسيوم، والبوتاسيوم لو حتصوم.

2- حضرتك بتاكل بعد حد الشبع.

بتعمل طبق كبير و بعدين تشبع في نصه بس مصمم تكمله علشان دخلت البيانات علي الابلكيشنز و خايف الدايت تبوظ.

طبعاً انا شرحت فوق 👆الكلام ده غلط ليه .

3- بتخاف من اكل الدهون لا تعلي الكوليسترول،

فالنتيجة وجباتك بتبقي بروتين زيادة عن اللزوم،

بدون دهون صحية اللي لازمة كمصدر للطاقة في الأول

4- بتروح نادي و بتاخد مكملات بروتين علشان تبني عضلات،

برضه نفس الفكرة،

ممكن تخرج من الكيتو بسبب زيادة البروتين.

5- مش بتاكل أكل طبيعي

( عيش كيتو، باستا كيتو – حلويات كيتو…. مشروب كيتو، منقوع كيتو الخ)

حضرتك مش عايز تغير عاداتك الصحية حتي بعد ما قدرت تتخلص من الكارب، انا مش بقول الحاجات دي غلط،

بس الاكثار منها ممكن يعمل ثبات في الوزن لان فيها بدائل سكر و عالية البروتين.

انا ممكن استعملها لكسر الروتين انما متبقاش هي الروتين، كل الطعام الحقيقي، الخضار زي ما هو، اللحمة، الزبدة، استمتع بخيارات الطبيعة افضل.

6- بتقلل السعرات علشان تخس اكتر، فالنتيجة بتجوع اكتر،

المخ بيتنبه لده فيقلل معدل الحرق و يزود عندك الجوع و يحصل لخبطة في الهرومونات المسئولة عن الجوع والشبع.

7- جسمك مش بيستجيب لحاجة من الحاجات دي :-

– المكسرات ؛ مشكلتها انها مش بتشبع فممكن تاكل كتير و ما تحسش، فنسبة الكارب تعلي و سعرات كتيرة بتاخدها وأنت مش محتاجها.

-سكر الدايت وده بيختلف استجابة الاجسام له، فلازم تشوف ظروف جسمك معاه ايه.

( حتكلم عنه بالتفصيل بعدين)

– الأجبان، الاكثار من الجبن ممكن يثبت ثبات الوزن لإن بروتينات الجبنة بترفع الانسولين.

بعض الدراسات بتقول ان أكل الجبنة بكميات كبيرة بترفع الانسولين بنفس درجة الجلوكوز بالظبط.

معندكش حاجة من دول ادخل على اللي بعده

المستوي التالت:

{إحنا كمصريين لو عندنا لايف استايل طبيعي نتحرق}.

فيه حاجات مهمة غير الاكل بتتحكم في نزول الوزن لازم تبقي مظبوطة أهمها :-

1- النوم: لازم تاخد كفايتك من النوم، لازم تصحي بعد النوم فايق و عندك نشاط،

قلة النوم بتلخبط الهرومونات و بتمنع نزول الوزن

2- التوتر العصبي، القلق، مشاكل العمل، حتي الخوف ان وزنك يثبت،

كل دول عوامل بترفع الكورتيزول طول الوقت، طبعاً للي ميعرفش الكورتيزول بيزود الجلوكوز و بيحفز افراز الانسولين ( بس خلاص 😃)

المستوي الرابع:

{ قوم اطمن على صحتك }

بعض الامراض العضوية والأدوية بتأثر علي زيادة الوزن اهمها

1- خلل الغدة الدرقية hypothyroidism، حضرتك لو مريض غدة يبقي لازم تتأكد انك بتاخد جرعة ( الثيروكسين) المضبوطة لجسمك، تتابع بتحليل وظائف الغدة، لو حاسس بتعب علي الكيتو و عدم استجابة او زيادة الوزن لازم تراجع طبيبك .

2- زيادة افراز هرمون الكورتيزول زي في حالة cushing syndrome

3- زيادة افراز هرمون النمو acromegaly

4- مرض تكيس المبايض PCOS

5- بعض الادوية اللي ممكن تاخدها و تسبب ثبات الوزن زي ادوية الكورتيزون اللي ممكن يكون موجود في بخاخ الربو، أو أدوية مضادات الإكتئاب، برضه منصحش حد يوقف اي دواء من نفسه لازم يراجع طبيبه.

ملحوظة

حالات ال cushing and acromegaly نادرة الحدوث، محدش يقلق، انما بالنسبة لنقص الغدة الدرقية فهي شائعة و كذلك العلاج بالكورتيزون .

المستوي الأخير

{وبشر الصابرين }

في المستوي ده نوعين من الناس

1- اللي طول عمره بيعاني من السمنة، لإن مثبت بالدراسة ان الدهون لو اكتسبتها حديثاً بتبقي اسهل في خسرانها غير لما يبقي بينك و بينها عشرة طويلة.

2- الناس اللي جربت كل الريجيمات التانية، قللت السعرات، جاعت، ورجعت زادت، و عملت رجيم تاني، دخل جسمها في حالة الحرمان مئات المرات starvation mood بنسميهم (yo yo dieting) .

الواحد منهم بيفضل يلف في دايرة مفرغة من الجوع والدايت والنهم و اعادة الدايت إلي مالا نهاية.

الناس دي ضربت معدل حرق أجسامهم في مقتل بدون قصد ،

بيبقي الحرق قليل جداً حتي بعد زيادة وزنهم و بيبقي صعب تخسر الوزن بسهولة،

كمان هرمونات الجوع ك (الجالرين) وآخرون بيبقوا عالين و هرمونات الشبع ك (الليبتبن) وآخرون بيبقوا قليلين جداً.

طيب ايه الحل في ثبات الوزن؟

1- دور علي السبب و عالجه يعني وقف نوع الاكل اللي عامل ثبات الوزن، نام كويس، قلل التوتر، اقرأ عن السمنة،إلي آخر الحاجات النمطية الجميلة دي.

2- ارجع كلاسيك كيتو كما بدأت أول مرة.

ارجع احسب كل النسب بتاعتك تاني بدقة، خد كربوهيدراتك من الخضروات الورقية بلاش تستعمل اي حاجة كانت ممنوعة قبل مرحلة الكيتو ادابتد keto adapted

3- لو انت بتلعب في مستوي (وبشر الصابرين)

يبقي انصحك بعد ما تدخل في الكيتوزيز ابدأ صيام متقطع طويل extended fasting

من 24 الي 48 ساعة مرتين او تلاتة اسبوعياً.

بتاخد الأملاح بتاعتك و بتشرب ميه، قهوة، شاي.

لو شايفه صعب اعمل صيام الدهون الأول و بعدين حوله لصيام الميه والأفضل اول يوم صوم دهون وتاني يوم حوله لصيام الميه.

لإن زيادة هرمون النمو و تنشيط عملية الإلتهام الذاتي autophagy بتحصل بعد 24 ساعة في الغالب.

الفكرة في الصيام ده إننا بنحسن معدل الحرق عن طريق الصيام، زي ما هو معروف بالنسبة للدكاترة السمنة إن

[ ارتفاع جميع الهرمونات لفترات قصيرة صحي و مفيد عدا العاق الانسولين ]، بالتالي متحسدوش الصابرين علي صبرهم لما تلاقوهم بيصوموا لمدد طويلة علشان يكسروا حالة الثبات و يحسنوا كفاءة أجسامهم .

3- الثبات بيبقي تدريب عملي علي المرحلة اللي وزنك حيستقر و حتبقي حابب تحافظ عليها، فخد الموضوع ببساطة واصبر لان فيه حالات الجسم بيحتاج ياخد نفسه قبل ما يرجع يكمل الطريق معاك.

رأيي الشخصي :-

حضرتك انسان عظيم، بدأت طريق صعب، من أول ما اتخذت قرار الكيتوجينك دايت،

سمعت كلام محبط كتير من اقاربك، اصحابك، الدكاترة اللي بيعالجوك، قطعت نص الطريق لحد مرحلة ثبات الوزن ،

اللي تشبه العقدة في العمل الأدبي ، بدونها القصة عمرها ما بتبقي شيقية للقارئ، العقدة اللي بتتفاقم فيها الأحداث و بيبقي فيها ذروة الصراع بين الشخصيات في العمل .

علشان كدة مفيش اديب بيزهق لما بيوصل في الكتابة لحد العقدة و يبطل الكتابة،

بالعكس دي علامة ان قصته حتبقي مشوقة فبيواصل،

فلازم تواصل لو حضرتك في المرحلة دي علشان تكمل أحلي قصة ممكن تكتبها لنفسك ويتعلم منها الآخرين.

متنساش حارب السمنة لانها لا تكف عن محاربتك

#حاصر_جيناتك_لا_مفر

share this :

عن admin

د.محمد الصباغ . طبيب مختص غدد صماء و سكر. بالمملكة المتحدة .. زميل الكلية الملكية ببريطانيا MRCP UK حاصل على شهادة الاختصاص العليا في الغدد الصماء والسكر من الكلية الملكية. SCE endocrinology and diabetes مهتم بأبحاث السمنة والتغذية العلاجية كجزء من التخصص الدقيق.

2 تعليقان

  1. رابعة المغربي

    انا في مرحلة ثبات وزن بس بعد التكميم
    رغم اني جربت الكيتو مانجحتش
    بس ماشية لوكاربز و ارجو التحسن

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *