الرئيسية » الكيتوجينيك دايت » ليه الأطباء متحيزين ضد الكيتو ؟

ليه الأطباء متحيزين ضد الكيتو ؟

share this :

ليه الأطباء متحيزين ضد الكيتو ؟

1- السمعة السيئة لجسيمات الكيتون وده لإرتباطها السببي بحالة حموضة الدم عند مرضي السكري من النوع الأول , زي ما اتكلمنا في المقال ده :

Nutritional Ketosis VS Diabetic Ketoacidosis

2- الكيتو دايت نظام عالي الدهون , وبالتالي الخوف من علو الكليسترول أزمة تؤرق كل واحد مش فاهم النظام كويس , دي مشكلة من زمان fat phobia

3- الاعتقاد الخاطئ بأن الكيتو دايت نظام عالي البروتين و كمان فيه فكرة متأصلة عند الغالبية العظمي إن تناول البروتين بيضر الكلي و بيسبب النقرص حتي لو الكلية سليمة .

4- ارتباط الكيتو دايت بعلاج مرض الصرع ( واللي اتحارب كتير كمان كوسيلة فعالة لعلاج الصرع بسبب جهل المتخصصين لحد ما تراكم الدراسات خلاهم يقتنعوا ) ,

ده خلي الأطباء تشعر بإن النظام قاسي و خطير ولا يسمح له إلا المضطر بعد نفاذ كل السبل التقلدية .

مثلا طفل بيعاني من صرع , أو مريض سرطان , إنما واحد عايز يخس يبقي لا ,

كأن السمنة مش مرض خطير ولا هي بتسبب أغلب الأمراض المسببة للوفاة ,

النقطة دي بالذات محتاجة شرح طويل لإن حلولهم التقلدية بتاعت قلل الأكل وزود الرياضة فشلت مئات المرات و مازالت بتفشل و حتفضل تفشل ,

بس عمرهم ما فكروا في حل بديل لأنهم ماشين بمبدأ ( ألفينا آبائنا هكذا يفعلون )

5- مش بحب اتهم حد بس أغلب المتخصصين مستفيد من الوضع الحالي بالعلاج بالطرق التقليدية ,

المرضي بيتوجهوا لأطباء التغذية بعد فشلهم المتكرر في انقاص وزنهم ,

بيلجأ لواحد يمشيه علي جدول ويخليه ياكل ربع زيتونة و يشرب شوربة هدهد يتيم و يبلع اعشاب غريبة و أدوية تزود الحرق و تشفط البطن والخ الخ .

, طبعا دي خطة في منتهي الذكاء , لو نجح المريض في تنفيذ ما سبق ,

عمره ما حيقاوم الجوع الناتج عن تقليل السعرات و بالتالي حيرجع ياكل و ساعاتها لما يفشل في انقاص وزنه حيقوله أكيد أكلت نص زيتونة و أنا قولت ربع زيتونة ,

المريض حيقول لا , يبقي أكيد الهدهد مكنش يتيم , المريض يقول لا والله , أنا جوعت و علشان كدة أكلت ؟ طبعا أكيد عارفين الدكتور حيقول ايه .

سنين طويلة من لوم الضحية دون اعادة النظر في الطريقة اللي احنا بنعالج بيها المرضي أو حتي الاطلاع علي تطورات العلم .

مثلا في الدراسة دي , واحد من كل 6 افراد بس اللي قدر يخس

https://www.nature.com/articles/ijo201094

أكيد لوعلاجهم فعال كان حيبقي سهل في التطبيق , كمان النتايج حتبقي افضل من 17 %

كمان اللي بيقدروا يخسوا علي النظمة التقليدية مش كلهم بيواصلوا , الدرسات بتقول حوالي 35% الي 50 % بيرجعوا لوزنهم بعد سنة واحدة من الدايت

https://www.ncbi.nlm.nih.gov/pmc/articles/PMC3901982/

حالة من الانكار أصابت الجميع , استحالة اننا نكون بنعالج غلط ,أكيد المريض هو اللي بياكل كتير .

القصد متصدقوش رأي أي حد في الكيتو لو مكنش بيطبقه علي نفسه و مش بيعالج به مرضاه ,

حتي لو كان دكتور في الجامعة و مالي بوستاته دراسات هو منقيها علشان تدعم وجهة نظره المسبقة بس .

share this :

عن admin

د.محمد الصباغ . طبيب مختص غدد صماء و سكر. بالمملكة المتحدة .. زميل الكلية الملكية ببريطانيا MRCP UK حاصل على شهادة الاختصاص العليا في الغدد الصماء والسكر من الكلية الملكية. SCE endocrinology and diabetes مهتم بأبحاث السمنة والتغذية العلاجية كجزء من التخصص الدقيق.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *