الرئيسية » الكيتوجينيك دايت » معضلة الريفيد الجزء الثاني

معضلة الريفيد الجزء الثاني

share this :

الريفيد في عالم الكيتو

اتكلمت عن فكرة الريفيد وليه ممكن ينفع مع الناس اللي علي الأنظمة قليلة السعرات في الجزء الأول.

معضلة الريفيد الجزء الأول

ليه مش بننصح بالريفيد في الكيتو ؟

 

الكيتو نظام مختلف عن باقي انظمة اللوكارب، لإننا فيه بنغير مكينة الحرق بتاعت جسمك،

تخيل عندك عربية بنزين و غيرتها لغاز طبيعي، علشان تعمل كدة لازم الاول تغير الموتور ( تقلل الكربوهيدرات تحت ال 20 جم علشان تدخل الكيتوزيز) ،

فيه فترة العربية حتلين فيها ( الكيتو فلو) ، بعدها بتبدأ تشتغل وتزيد كفاءتها مع الوقت ( أول شهور في الكيتو) ،

بمرور الوقت أجهزة العربية بتتعود علي الغاز الطبيعي و بنتسي البنزين خالص ( الفات أدابتد)، 

الحقيقة الغاية الكبري في الكيتو، هو الوصول للفات أدابتد، ده مرتبة اليقين اللي بيوصل لها العبد الكيتوني بعد الطاعة والالتزام بصحيح الكيتو.

 

إيه اللي بيحصل لما بتوصل لمرتبة الفات أدابتد؟ 

فيه حاجات مش بتبان تأثيرها في أول الكيتو، بس لما جسمك بيتعود علي استغلال الكيتونات بيبدأ تأثيرها عليك يبان زي مثلاً

1- ارتفاع اليورك اسيد في الاول نتيجة لقلة اخراج الكلية له مع البول، الكلية في الأول بتخرج الكيتون و بتحافظ علي اليورك اسيد و بعد فترة بتفهم ان الكيتونات مفيدة فبتحافظ عليها و تنزل اليورك أسيد. 

ده السبب الرئيسي إن حمض اليوريك بيعلي في اول الدايت مش علشان أكل اللحمة الكتير زي ما البعض بيدعي، هما وجدوا انه بيقل التخلص منه مش بيزيد انتاجه. 
عرفوا ده لما حقنوا الكيتونات في الدم فلقوا منسوب اليورك اسيد عالي و قل افرازه 
زي الدراسة دي 

https://www.metabolismjournal.com/…/S0026-0495(65)80039…/pdf

والدراسة دي 

https://www.nejm.org/doi/full/10.1056/NEJM196502182720705

 

2- مع الكيتوجينك دايت بيزيد انتاج مصانع الطاقة في الخلية (الميتكوندريا) ودي بتحصل مع طول مدة الكيتو، مش حتحصل لو قاعد تدخل و تخرج كل يومين تلاتة. 
https://onlinelibrary.wiley.com/…/…/j.1471-4159.2008.05460.x

https://onlinelibrary.wiley.com/doi/abs/10.1002/ana.20899

3- بيقل الدهون الثلاثية و يزيد الكوليسترول الصحي HDL و large particle LDL

https://www.metabolismjournal.com/…/0026-0495(83)90105-1/pdf

4- بتزيد كفاءة الحرق للدهون عند الرياضيين.
https://www.metabolismjournal.com/…/S0026-0495(15)…/fulltext

5- بيرجع يتبني الجلاكوجين بتاع العضلات تاني 
راجع المصدر السابق

6- ال metabolic flexibility أو مرونة التمثيل الغذائي و هو مقدرة الجسم علي نقل مصدر طاقته بسهولة من كربوهيدرات الي دهون و العكس ( لانها بتزود الميتكوندريا و بتحسن مقاومة الجسم للانسولين)

الخلاصة :

 

كل الحاجات الحلوة دي مش حتعرف تتمتع بيها الا لو بقيت فات ادابتد،

يعني نسيت الريفيد خالص وركزت انك تتمسك بصحيح الكيتو. 

يعني فكرة التعود او التكيف مع نظام الكيتو صح و مفيدة عكس لما تبقي علي رجيم العينات ( قصدي السعرات)

طيب مش اي دايت بتأثر علي معدل الحرق؟

 

الدراسات بتقول مع الكيتوجينك دايت عكس كدة، دي بتزيد معدل الحرق كمان،

الفكرة ان علشان يحصل حرق الدهون fat oxidation لابد من تقليل مستوي الأنسولين وده مش بيحصل مع الدايت العادي، انما بيحصل بسهولة مع الكيتو والصيام المتقطع. 

دي مثلاً دراسة عن بتثبت ان الصيام الطويل نفسه بيزود معدل الحرق، مش بيقلله 

https://academic.oup.com/ajcn/article/71/6/1511/4729485

ودي دراسة حديثة لسه نازلة في واحد من أقوي المجلات الطبية، بتقول ان في الكيتوجينك دايت بيزيد معدل الحرق و بيقل هرمون الجوع و بيقل هرمون الانسولين والليبتن 

https://www.bmj.com/content/363/bmj.k4583

القصد برضه، لا يجوز الريفيد لإنتفاء السبب، أنت لا بتجوع في الكيتو و لا معدل الحرق بيقل و التعود علي الكيتو مفيد ولو فوائد مش مؤذي زي في رجيم العينات ( أقصد السعرات 😃😃)

طب لو عملنا ريفيد، حيجري حاجة؟

والنبي حيجري حاجات.

تخيل إنك أب ل محمد و عمر ، آخر الشهر و مش معاك غير 100 جنيه يدوب يكفوك لحد ما تقبض ، حمادة طلب لعبة ب 70 جنيه، بس عمر سخن و لازم يكشف عند دكتور، تفتكر حتصرف الفلوس المحدودة علي مين؟

جسم الإنسان طول الوقت بيعمل كدة، لما بيبقي فيه حاجة تقل عنده بيصرفها في مكانها الصح. 

في الكيتو بيقل تناول الكربوهيدرات في الطعام، فبيضطر الجسم يصنعها من الدهون والبروتين، ولان المخ أهم أعضاء الجسم و بيحتاج 25% علي الاقل من طاقته من الجلوكوز، الجسم بيفضل الجلوكوز يروح للمخ و يمنعه عن باقي الأعضاء،

عن طريق زيادة نسبية في مقاومة الانسولين، بالطريقة دي يمنع الانسولين يأثر علي هرمون الجلوكاجون اللي مهم لتصنيع السكر، كمان يحافظ علي مستوي السكر في الدم و للمخ و خلايا الدم الحمراء . 

العملية دي بنسميها ( مقاومة الانسولين الفسيولوجية ) علشان نميزها عن الحالة المرضية لمقاومة الجسم للأنسولين. 
( حيجي وقتها في الشرح بالتفصيل)

تعالوا بقي نعمل ريفيد، بعد ما جسمك عامل مقاومة فيسيولوجية، حتاكل كربوهيدرات، السكر في الدم حيزيد و الانسولين حيزيد ولكن الانسولين اول شوية أيام حيبقي لسه مش قادر يدخل السكر في الخلايا بكفاءة عالية زي الأول،

يبقي انت عليت السكر في الدم و عليت الانسولين. مش بس الأنسولين لوحده، 
الأنسولين بيخزن السكر و بيحوله لدهون علي الكبد في الأول. 
https://academic.oup.com/ajcn/article/96/4/727/4576835

 

بيخزن الميه والملح. وشك ينفخ و يجبر الفوسفات و باقي الاملاح تدخل جوا الخلايا، اللي ممكن تسبب أعراض عنيفة

كمان نتيجة لعدم تناول الكربوهيدرات لمدد طويلة القولون بيتفاجئ بالكمية اللي بتدخلها وبيدأ يتعصب و يتغابي عليك.

يبقي مش بس ضيعت علي نفسك فرصة دخولك في حالة الفات أدابتد، لا أنت أصبت جسمك بالضرر.

ملحوظة :-

الدهون اللي علي الكبد بتنزل تاني بس ممكن تطول لو انت معندكش مرونة في التمثيل الغذائي metabolic flexibility

 

الريفيد الآمن

 

الحقيقة مفيش ريفيد آمن زي مفيش معصية بدون سيئات ولكن فيه فرق بين ريفيد عن طريق زيادة في المسموحات من الكيتو، و ريفيد علي حاجات برة الكيتو.

فيه فرق بين ريفيد علي كمية صغيرة من كربوهيدرات معقدة مخلوطة بدهون زي ريفيد عضوة قديمة و محترفة ( ريفيد بطاطا مع زبدة 😃😃)، عن ريفيد البقسماط ( عضوة قديمة تانية 😃😃)، وريفيد واحد قديم علي المانجا العويسي 😃😃😃، أو ريفيد الرجالة اللي بتاكل الاخضر واليابس لما ينووا يطلعوا برة الكيتو 😃😃

الخلاصة

 

كمية الكربوهيدرات في الريفيد، جودتها، مدة الريفيد، مرونة جسمك، كلها عوامل بيتحدد علي أساسها الأعراض اللي حتحصل لك بعد الريفيد

طيب فيه ناس عملت ريفيد علشان تكسر الثبات في الكيتو و نجحت في كسره.

ده فعلاً حصل مع ناس قليلة ولكن مفيش أي دليل علمي علي كلامهم، أغلب الظن ان جسمها زاد الاول ورجع خس الميه و الدهون اللي اتخزنت بعد الريفيد، اتشجع والتزم اكثر فكمل نزول الوزن. 

الحاجة التانية وللأمانة، بعض الناس مش بتستجيب للتقليل الشديد قوي للكربوهيدرات ( مش لاقي تفسير علمي ولكن دي ظاهرة اترصدت في بعض الناس) ،

الناس دي لما بترفع الكربوهيدرات شوية جسمها بيحرق كويس، مش عايز ناس تركز مع المجموعة دي من الافراد لان دول جسمهم من الاول مستجبش للكيتو بالتقليل الشديد للكارب،

انما طالما أنت جسمك نزل في أول الكيتو يبقي فيه سبب تاني للثبات 
راجع مقال ثبات الوزن

دليلك الشامل في حالة ثبات وزنك


ازاي اعالج الريفيد بطريقة آمنة و فعالة.

 

1- بعد الريفيد صوم لحد ما تجوع تاني 

2- تناول أملاحك كأنك في أول أيام الكيتو 

3- ارجع كلاسيك ( تناول لحوم حيوانية و خضروات ورقية كذا يوم بدون وصفات أو مسموحات تانية) 

4- العب رياضة علشان تسرع استجابة جسمك لحرق الجلاكوجين والدهون.

خلاصة الخلاصة. 

الريفيد غلط في الكيتو لإن السبب الرئيسي للريفيد مش موجود.
( معندكش جوع ولا معدل الحرق بيقل، طول الدايت مفيد مش مضر)

بلاش تعمل ريفيد تاني ولو عملته خليه وجبه واحدة بس،

بنوع واحد من الكربوهيدرات المعقدة او ثمرة فاكهة واحدة،

يعني لو ضعفت يبقي في المعقول مش تحرق كل سفن الرجوع

حارب السمنة لأنها لا تكف عن محاربتك 
#حاصر_جيناتك_لا_مفر

share this :

عن admin

د.محمد الصباغ . طبيب مختص غدد صماء و سكر. بالمملكة المتحدة .. زميل الكلية الملكية ببريطانيا MRCP UK حاصل على شهادة الاختصاص العليا في الغدد الصماء والسكر من الكلية الملكية. SCE endocrinology and diabetes مهتم بأبحاث السمنة والتغذية العلاجية كجزء من التخصص الدقيق.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *