الرئيسية » الكيتوجينيك دايت » الهدف من الكيتو

الهدف من الكيتو

share this :

إيه هدفك من وراء الكيتو ؟

أو بالبلدي كدة أنت دخلت الكيتو ليه من الأول ؟

  

ليه السؤال ده مهم لأنه يحدد عليه اجابة ٣ اسئلة تانية

١- إيه الطريقة اللي اتنفذ بيها الكيتو

٢- إزاي أتابع نفسي و أنا على الكيتو دايت

٣- هل الكيتو دايت تنفع لايف ستايل

 .

طيب تعالوا نشرح بالتفصيل

عندنا ٤ أفراد و سألناهم قبل الكيتو السؤال الأساسي

ايه هدفكم من دخول الكيتو ؟

الأول : قال أنا عايز أخس الكام كيلو الزيادة ، الحمد لله أنا معنديش أمراض

الثاني : أنا جسمي مثالي بس سمعت أن الكيتو بيحسن كفاءة الرياضيين و بيدي شكل كويس

الثالث : أنا وزني زايد و مريض سكري و ضغط و كوليسترول و باخد ١٠ أنواع أدوية

الرابع : أنا مريض سرطان و سمعت أن الكيتو ممكن يساعدني في العلاج

هنا جه دور “ كيتو كود “ عشان يجاوب على أسئلتهم

********

بالنسبة للأول : 

الطريقة اللي ينفذ بها الكيتو هي الطريقة الكلاسيكية دهون ٧٠ % ، كربوهيدرات ٥% و 

بروتين ٢٠ % ، ياكل لحد الشبع و ما ياكلش غير لما يجوع

عايز يلعب رياضة يبقي كويس علشان صحته ، مش عايز الدايت كافي

لما يقول لنا أتابع إزاي الكيتو إنه نجح معايا ؟

حقوله أوزن مرة في الاسبوع علي الاقل و خد مقاس محيط الوسط

طيب محتاج اشوف الكيتوزيز في الدم ، البول أو النفس ؟

لا مش مطلوب بس لو حابب مفيش مشكلة .، طالما هدفك انك تخس يبقى لازم تتابع وزنك و مقاساتك مش كيتوناتك

طيب ينفع الكيتو يبقى لايف ستايل بالنسبة لي ؟

وأنت في رحلة الكيتو بتكتشف فوائد تانية مكنتش واخد بالك أنها عاملة مشكلة قبل الكيتو ، 

مثلا قولونك ارتاح ، ذهنك بقي صافي وبقيت حاسس بطاقة

لو حاسس بفوائد تانية و مش عايز تضيعها منك تقدر تكمل بالكيتو لايف ستايل ، 

لو مش فارق معاك و كان بالنسبة لك الكيتو مجرد وسيلة تنزل وزنك 

يبقى اطلع منه على أي نظام غذائي صحي زي أنظمة لوكارب 

و لو حسيت ان وزنك بدأ يزيد و رجعت مش قادر تسيطر على نفسك في الأكل ، 

ارجع تاني كيتو

بالنسبة للثاني : 

اللي عايز الكيتو كنظام لزيادة كفاءة الرياضيين و بناء عضلات

 

ازاي يطبق الكيتو ؟

يظبط احتياجه من البروتين علي حسب مجهوده الرياضي و كثافة البروتين 

بمعنى إنه لو بيمارس رياضة كمال الاجسام ممكن يرفع البروتين إلي ١.٦ جم الى كل كيلو جم من وزنه أو حتى لحد ٢.٢ جم

يقدر ينوع في نوع الكيتو اللي حيمارسه ؟

التقليدي زي بتاع السمنة

محدد الهدف targeted اللي فيه بياخد احتياجه من الكربوهيدرات اليومية في الوجبة اللي قبل التمرين

كيتو عالي البروتين

 high protein ketogenic diet  اللي البروتين ممكن يوصل الي ٣٥% من مجمل سعراته

كمان ممكن انصحه برفع نسبة الكربوهيدرات شوية لو داخل مسابقة أو حس بقلة طاقة أثناء التمرين

حقوله يأكل وجبتين في اليوم بحيث يكون التمرين بينهم و يصوم باقي اليوم ،

 علشان بالطريقة دي ارفعله الأنسولين و ال mTOR و ال IGF 1 اثناء التمرين بحيث يستغلهم في بناء خلايا عضلية جديدة و بعدم الأكل المدة الكافية هتدي فرصة ان مستواهم ينزل في الجسم ميتأثرش بزيادتهم ( يعني ميزودوش بناء خلايا سرطانية مثلا)

طيب يتابع نجاح الكيتو معاه ازاي ؟

يشوف المقاسات ، يشوف نسبة الكتلة العضلية و نسبة الدهون و الأهم من ده كفاءة التمرين

طب ينفع له الكيتو كلايف ستايل ؟

طول ما بيستفاد منه و بيبني عضلات وكفاءته بتزيد يكمل في الكيتو  ، الأمر راجع له شخصيا

  

بالنسبة الراجل الثالث :

 اللي عنده سكر و ضغط و كوليسترول

يطبق الكيتو بالطريقة التقليدية بس أنا هلزمه يقلل الكارب تحت ال ٢٠ جم توتال في اليوم و ياخدهم كلهم من الخضروات الورقية و الغير نشوية

هخليه ياخد بروتين بين ال ١٥ الي ٢٠ % ، يعني ممكن ١ جم الي كيلو جرام من كتلته العضلية أو أقل

هخليه يبقى حذر لما يبدأ الصيام المتقطع علشان ميحصلش له أي مضاعفات

و الأهم من كل دول لازم يتابع مع طبيب باطني أو غدد صماء يظبط له أدويته و جرعاته

إزاي يتأكد أن الكيتو ناجح معاه  ؟

يقيس سكره بانتظام كذا مرة في اليوم في الأول طول ماهو على الأدوية و بعدها ممكن مرة الصبح بعد كدة و ممكن عند اللزوم علي حسب استجابته ، ده طبعا غير الميزان و المقاسات

محتاج يقيس الكيتونات ؟

لا مش محتاج ، الهدف هنا تظبيط السكر بحيث يبقى نموذجي مش أن يبقى فيه كيتونات

طيب لو هو عايز يقيس الكيتونات ؟

طبعا ده أفضل بس برضه أي نسبة من الكيتونات أعلى من 0.5 يعتبر في كيتوزيز

طيب الكيتو ينفع كلايف ستايل ؟

هنا الكيتو لازم كلايف ستايل 

و لكن يقدر لما يوصل للوزن المثالي يزود نسبة الكربوهيدرات بالتدريج 

و يتابع قياس السكر بحيث يفضل محافظ على مستوى السكر في الدم . 

ولكن لا يجوز له بأي حال يرجع يأكل رز و مكرونة و عيش تاني و ياخد حلويات زي الأول

بالنسبة  للرابع :

مريض السرطان

حيمشي نظام الكيتو التقليدي مع بروتين معتدل الي قليل ممكن من ١٠ % الى ١٥ %  بروتين و دهون

 تصل الي ٨٥% ممكن يزود MCT oil و ممكن كمان يزود كيتونات خارجية exogenous ketone بحيث يفضل في حالة الكيتوزيس طول الوقت

يعمل دورات من صيام المياه مع الكيتو ، 

بمعني أثناء العلاج الكيماوي أو العلاج الإشعاعي ، ياكل كيتو وجبات عالية السعرات عشان ميخسرش وزنه ، 

انما قبل دورة الكيماوي مثلا ممكن يصوم صيام ميه و هكذا 

(ده له أساس علمي بس حيجي وقته في الشرح مرة ثانية بالتفصيل)

طبعا مينفعش ينفذ ده مع نفسه ، لازم يستشير طبيب الأورام و طبيب التغذية العلاجية 

و لازم يثقف نفسه و يعرف أن الاسلوب ده مش الأسلوب التقليدي اللي بتنصح به التوصيات 

و لا حتى اللي مقتنع به الاطباء و بينفذوه . 

علشان ميتصادمش مع أطباؤه و يتهمهم اتهامات باطلة

طب يتابع نجاح الكيتو ازاي ؟

يقيس الكيتونات و الجلوكوز في الدم فيما يعرف بالمؤشر الجلوكوز الكيتوني ،

 بحيث يحاول طول الوقت يبقى النسبة ١ إلى ١

 بمعني أن لو السكر ٤ ملي مولز تبقي الكيتونات ٤ هي كمان

طيب المقاسات و الميزان و الحاجات دي 

( كلها ثانوية )

تظبيط الكيتونات و المتابعة بالاشاعات الدورية هو الأساس

 طيب معاهم الكيتو ينفع لايف ستايل ؟

طول فترة العلاج و طالما فيه استجابة لازم يفضل الكيتو لايف استايل و بعد العلاج لازم يفضل في كيتوزيز علشان وقاية من أي انتكاسات

 

القصــــد

 رغم أن دول أربع أفراد عايزين يدخلوا الكيتو دايت 

إلا أن الإجابة على كل واحد في كذا سؤال تبدو مختلفة على حسب هدفه إيه من الكيتو

يبقى حضرتك لازم تعرف أنت عايز إيه من الكيتو الأول قبل ما تبدأ 

علشان تكون الرؤية واضحة لك علي طول

حارب السمنة لأنها لا تكف عن محاربتك

share this :

عن admin

د.محمد الصباغ . طبيب مختص غدد صماء و سكر. بالمملكة المتحدة .. زميل الكلية الملكية ببريطانيا MRCP UK حاصل على شهادة الاختصاص العليا في الغدد الصماء والسكر من الكلية الملكية. SCE endocrinology and diabetes مهتم بأبحاث السمنة والتغذية العلاجية كجزء من التخصص الدقيق.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *