بالنسبة لأولادنا .. الكيتو مناسب من سن كام ؟

طيب لو 13 او 14 او 15 سنة مثلاً 

وعايزين نمشيهم لوكارب عشان يخسوا بطريقة صحية 

ويبتعدوا عن احتمالية الإصابة بالسكري مستقبلاً 

– خصوصا لو الاسرة بها مصابي سكر نوع ثاني يعني العامل الوراثي موجود – 

يناسبهم كام جرام كارب في اليوم ؟

وهل يوجد نظام لوكارب مخصص ليهم عشان ميأثرش على مرحلة النمو 

– بحيث يسمح مثلا بشوية نشويات معقدة وبقول وفواكه قليلة السكر عالية الألياف ؟

 

الإجابة

 

الحقيقة مفيش ما يمنع أي نظام غذائي عن الأطفال

 طالما الطفل بياخد عناصر الغذاء الأساسية منه .

بالنسبة للكيتو 

أنا بقول بلاش مع  الأطفال في سن صغيرة لو ملهوش غرض طبي 

مش علشان ان الكيتو ممكن يسبب نقص في عنصر غذائي و فيتامين معين ، 

احنا بنقول بلاش علشان التطبيق محتاج حرص و محتاج فهم كويس للنظام .

 

كمان من الدراسات وجدوا أن الأطفال اللي بيتحطوا علي انظمة غذائية شديدة الصرامة في الصغر 

ممكن تؤدي لأمراض شراهة في التغذية و سمنة بعد كده ، 

فـ بالراحة مع الأطفال 

خصوصا أن أغلبهم جسمه يستجيب بسهولة مع تغير العادات الصحية .

 

لو الطفل اللي جسمه مقاوم للأنسولين ( ده بالكشف الطبي والتحاليل ) يبقي ينفع *تحت اشراف طبي * 

أن الطبيب يختار له الكيتو أو أي نظام لوكارب آخر 

مناسب له و يحدد له خيارات طعامه المناسبة .

 

الطريقة الفعالة لعلاج السمنة عند الأطفال 

هي تغيير العادات الصحية للأسرة كلها ، 

بمعني متعملهوش بروكلي و أنت بتاكل محشي ، 

تديله مكعب ليندت و أخوه بياكل ايس كريم .

 

الأكل اللي عايز طفلك يأكل منه البيت كله يأكل منه 

و الاكل اللي مش عايزه ياكل منه محدش في البيت يأكله .

عايز طفلك يلعب رياضة شاركه و العب معاه .

 

مثبت بالدراسات ان لما الآباء يشاركوا الطفل في نظامه الغذائي

 بيبقي افضل بكتير من مشاركة الطفل نفسه لوحده .

 

طيب ايه الـ لوكارب اللي ينفع مع الأطفال ؟

لوكارب يعني جرامات كربوهيدرات أقل من ١٣٠ جم في الغالب .

بعض الناس بتقول ١٨٠ و البعض ١٥٠ جم لو عايز تعرف الإختلاف جه منين ، 

ببساطة علشان المفروض  الـ لوكارب اللي متبنياه الأنظمة الغذائية 

( مش تعريف المنظمات الغذائية ) بيبقي ٣٠% كربوهيدرات و ما دونها .

و بالتالي لو مجمل سعراتك اليومية ٢٠٠٠ سعر حراري 

غير لما يبقي ٣٠٠٠ سعر حراري في عدد الجرامات .

طب يعني ايه نظام غذائي صحي ؟

يعني تاكل طعام صحي عالي الجودة غير مصنع .

يعني طعام أهل الكيتو و زود عليه شوية فاكهة قليلة المحتوى الجلايسيمي 

زي الكيوي ، برقوق ، برتقال ، يوسفي .

زود بقوليات ( لو جسمك مش بيتعب منها ) ، 

زود مكسرات زي الكاجو والفستق ( لو جسمك مش بيتعب منها)    

الافضل لو مش قادر تعمل كدة ادخل نظام لوكارب 

و نفذه بحذافيره زي الباليو دايت او اتكنز دايت .

الخلاصة

١- مفيش ما يمنع من تطبيق الكيتو تحت إشراف طبي

 لو كان جسم الطفل مقاوم للأنسولين برضه ناتج عن تشخيص الطفل

٢- اللوكارب مظلة كبيرة تحتها أنظمة كتير 

اختار ما يحلو لك أو خليك كيتو ليبرال زي ما شرحت لك فوق

٣- لا يغير الله أطفالكم حتى تغيروا ما بأنفسكم .