الرئيسية » الكيتوجينيك دايت » المعارضين للكيتو في الميزان

المعارضين للكيتو في الميزان

share this :

معليش استحملوني لو كان كلامي المرة دي مخالف للتوقعاتكم .

1-ليه معظم الأطباء بتعارض الكيتو مع اننا شايفنه نظام صحي و فعال.

كنت جاوبت علي السؤال ده في مقال مفصل.

هنا 👎

ليه الأطباء متحيزين ضد الكيتو ؟

والصراحة المقال ده كتبته وانا منفعل كرد فعل لبوست لطبيبة تغذية جمعت كل الدراسات اللي ضد الكيتو و قالت ان دي بس المصادر العلمية اللي ذكرت الكيتو.

فأنا للأسف وقعت في نفس المشكلة و رديت بإنفعال و اتهمتهم ضمنياً بالتقصير و مفيش حد فينا معصوم.

بس عايز أضيف شوية نقاط تقتضيها الأمانة

النقطة الأولي

ليه فيه أطباء صدقت الكيتو؟

زميل عزيز و مؤسس جروب كبير في الكيتو عبر لي عن دهشته لما لقي الناس أيدت الصيام المطول و بدأت في تنفيذه بعد تجربة ال 5 أيام صيام مطول لي،

في حين هو لما عمل كدة قبل مني الناس هاجمته هجوم عنيف…….. إيه الفرق؟

زميل آخر سألني ليه معظم الأطباء اللي بتعارض النظام و كانت بتهاجمه في جروبات تانية، عندك هنا وديعة و مسالمة و بعضهم نفذ النظام علي نفسه…….. إيه الفرق؟

استشاري قلب في انجلترا تواصل معايا من كام يوم عايز لينك الجروب علشان يدل حالات صعبة من مرضاه العرب، بتكافح في انقاص وزنها.

لما سألته، أنت عارف إني مش مهتم بنظرية الكوليسترول و أمراض القلب

Cholesterol heart theory.

قالي انه عارف…… إيه الفرق.

الموضوع ببساطة اننا هنا في الجروب بنتكلم باللغة اللي بيفهمها الأطباء،

لغة بسيطة جداً اتربوا عليها من أولي طب، المعلومة تبقي من متخصص و مدعومة بالمصادر العلمية

و يكون صاحب المعلومة قادر على النقاش واثبات صحة معلومته.

ده اللي بنحاول نعمله طول الوقت، حتي لما بجاوب علي سؤال وأحطه في هاشتاج #مما_هبدت،

ببقي مستعد لعرض المصادر لو حد طلبها ، لإني في الهاشتاج ده بجاوب عفوي و من الذاكرة.

الخلاصة :- هناك لغة يفهمها الأطباء و هي كلام علمي من متخصص مدعم بالمصادر العلمية.

ده بيخلي بعض الأطباء تتلخبط لما تلاقي اتنين متخصصين بيعرضوا وجهات نظر مختلفة و كل منهم له مصادره.

النقطة التانية

 

الجايدلاينز و البروتوكولات الطبية.

علشان تبقي الممارسة الطبية آمنة و علشان نقدر نحاسب الأطباء علي أخطائهم المهنية،

لابد من وجود مصدر طبي موثوق يتوجه له الطبيب المعالج في حالة علاجه للمريض،

المصدر ده بتعتمده جهات طبية عليا و في حالة تنفذيه حتي لو تضرر المريض،

يبقي الدكتور في آمان لانه لم يخالف المتعارف عليه.

البروتوكولات الطبية دي مهمة علشان نسبية المعرفة بين الأطباء و علشان تحمي المريض في حالة اقتناع الدكتور بمعلومات طبية غير صحيحة ولكن برضه هي غير ملزمة للطبيب المعالج،

يستطيع فعل ما يخالفها اذا شعر انه يجود أفضل منها لحالة المريض.

أغلب البروتوكولات لم تذكر اللوكارب كعلاج لإنقاص الوزن أو لمرضي السكر.

النقطة الثالثة

الجايدلاينز اللي ذكرت اللوكارب غير كافية و غير مقنعة بالنسبة للأطباء .

فيه بعض جايدلاينز ذكروا اللو كارب ك بتروكول علاجي ولكن بالتمعن فيهم تجد انهم لم يفضلوه عن غيره،

بالعكس تستشعر انهم يضعونه في ذيل القائمة حين مقارنته بأنواع الدايت المختلفة وده له أسباب حوضحها بعدين.

منها

1- رابطة التغذية البريطانية

https://www.bda.uk.com/…/policy_statement_-_low_carbohydrat…

2- رابطة السكر الأمريكية

الرعاية النموذجية لمرضي السكر 2019

Standard care of diabetes 2019

ودي حنتاول شرحها بالتفصيل في بإذن الله قريب جداً

http://care.diabetesjournals.org/content/42/Supplement_1/S46

حتلاحظ انه ذكر ان اللوكارب موجود ولكن لم ينصح بيه كأول دايت.

3- رابطة علاج السمنة

Obesity medicine association.

الخلاصة لو الطبيب مش مقتنع بالدايت، لسه مصدق ان تناول الدهون مضر بالصحة،

ايه اللي حيخليه يأيد دايت في أحسن الأحوال مش حتفرق عن غيرها من الأنظمة الغذائية،

بالعكس فيه كلام ضدها كتير و حرب من المنظمات الطبية الكبيرة.

ماذا يحدث لداعمي اللوكارب.

– محاكمة جاليلوا و بروف توم نوك.

في 3 فبراير 2014، أطلق بروف نواك تغريدة علي حسابه، كانت إجابة علي سؤال مفخخ من أم بتسأل ايه افضل نظام تفطم ابنها عليه.

هو اجاب افطمية علي اللوكارب.

قرأت التدوينة رئيسة منظمة التغذية بجنوب افريقيا و اتنرفزت واشكته للنقابة لسحب ترخيصه و تمت محاكمته.

بروف توم نوك أفني عمره في تأييد الكربوهيدرات ، كان من اشهر الناس اللي في العالم بتأيد تناول الكربوهيدرات للرياضيين،

هو نفسه كان رياضي و بيجري الماراثون ، ألف كتاب اسمه lore of running ذكر فيه ان افضل طريقة لتغذية الرياضيين هي تناول الكربوهيدرات بكثرة.

لحد ما اكتشف انه مريض سكري، قعد يسأل نفسه ايه السبب؟

ده رياضي، وزنه مثالي كمان ملتزم بالجايدلاينز يبقي ليه يجيله السكر؟

فكر و بحث و عرف ان الكارب أساس كل كرب و اتغيرت حياته،

اعتذر عن كلامه السابق ومزق الجزء الخاص بتناول الكربوهيدرات من كتابه.

و لإنه بايونير في مجاله، حاول يغير قناعات الناس عن الكربوهيدرات،

فواجه حملة شعواء في التشكيك في عمله من تلاميذه و زملائه ومن المنظمات الداعمة للكربوهيدرات،

انتهت بمحاكمته كما حدث مع جاليلوا لما الكنيسة استشعرت خطورة العلم علي عرشها و معتقداتها.

 وثائقي عن المحاكمة للي محتاج تفاصيل أكتر.

-دكتورة سارة هالبرج و علاج السكر.

– نشرت دكتورة هالبرج، دراسة تداخلية عن الكيتوجينك دايت كعلاج لمرض السكر من النوع التاني، أثبتت ان بعد عام، بيتم شفاء

60% من المرضي شفاء تام، و الباقين قل جرعات الأدوية ، تحسن في التراكمي اكتر من 1.3، تحسن ملحوظ في الدهون الثلاثية وانزيمات الكبد .

https://link.springer.com/article/10.1007/s13300-018-0373-9

ما الذي حدث؟

لم تدعي لأي مؤتمر علمي لمناقشة دراساتها، رغم ان هناك مؤتمرات تبني و تقام بسبب دواء حقق نسبة شفاء 3%.

تم منعها من مناقشة الكونغرس لعرض مقترح لتوفير مليارات الدولارات التي تنفق سنوياً علي علاج امراض السمنة والقلب والسكري. والذي رفض دعوتها عضو في جمعية القلب الأمريكية.

(طبقاً لكلام د.برت سيشر طبيب القلب)

يتعرض المؤيدين للوكارب الي المنع من الدعوة للمؤتمرات الممولة من شركات الدواء و من الهيئات العلمية الكبيرة

– يتم تسليط الضوء علي ما يدر الربح المادي لشركات الأدوية فقط عن طريق دعم المؤتمرات ودعم الدراسات العلمية.

راجع كتاب نينا تيكولز nina teicholz

The big fat surprise

عرضت فيه كيف تم تلميع زيت الزيتون لجعله أفضل الزيوت الصحية علي حساب زيت النخيل وجوز الهند.

حتفهم ساعتها ايه اللعب اللي بيحصل في الدراسات وليه الهيئات بتعمل كدة.

الخلاصة.

الكلام كتير في النقطة دي، أنا نفسي في شغلي حذر جداً في علاج المرضي باللوكارب

ولازم استشير الاستشاريين اللي شغال معاهم و ساعات كتيرة بيرفضوا لمجرد خوفهم من نظام ميعرفوش عنه الكتير.

( أنا بتكلم عن استشاريين في انجلترا و بروفيسورات في ايرلندا اشتغلت معاهم، مش اطباء عاديين)

طبعاً مقدر جداً الغضب علي الأطباء لما بينصحوا المرضي بعدم الدخول في الكيتو وده ممكن يكون أسوأ نصيحة تضر المريض ولكن أنا حبيت أعرض لكم وجهة نظرهم في الكيتو، والمرة دي بحيادية اكتر.

أهم نقاط التعارض

1- الكيتو مرتبط بعلاج أمراض خطيرة

2- مخالف للمتعارف عليه في دراسة الطب و اعتقاد الاطباء لسنين طويلة

3- الجايدلاينز والبرتوكلات اما لم تذكره أو ذكرته كوسيلة للعلاج ولم تفضله علي باقي الانظمة

4- التعتيم المتعمد علي نتائجه والحرب علي رواد الكيتو في العالم، ده مانع الاطباء انها تعرف عنه من مصادره الموثوقة.

فياريت حتي مع غضبنا من الأطباء بلاش نتهمهم بالجهل أو فساد الذمة ( رغم أنا لا أنفي الصفتيين عن بعضهم)

دمتم كيتونين.

#حاصر_جيناتك_لا_مفر

share this :

عن admin

د.محمد الصباغ . طبيب مختص غدد صماء و سكر. بالمملكة المتحدة .. زميل الكلية الملكية ببريطانيا MRCP UK حاصل على شهادة الاختصاص العليا في الغدد الصماء والسكر من الكلية الملكية. SCE endocrinology and diabetes مهتم بأبحاث السمنة والتغذية العلاجية كجزء من التخصص الدقيق.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *