كتبت د. آيات الوهابي
سقوط الشعر في الطور الانتهائي
( Telogen Effluvium Hair Loss)
الموضوع دا مهم بيضايق الناس من انظمة الدايت عامة و الكيتو خاصة
ومن اسمها كدة نستنتج ان النوع دة من تساقط الشعر بيحصل في الشعر اللي في المرحلة الاخيرة قبل ظهور الشعراية الجديدة…
مهم جدا نعرف أن الشعراية بتمر ب 3 مراحل قبل سقوطها
1. anagen phase مرحلة النمو 👶
2. catagen phase مرحلة ثبات 👩
3. telogen phase مرحلة استعداد الشعرة للسقوط 👨
وكل مرحلة من دول مدتها تزيد او تقل على حسب جينات كل شخص
يعني النوع ده من تساقط الشعر المؤقت طبيعي و بيحصلنا كلنا
بس بمعدل قليل وفي أوقات متفاوتة كنوع من أنواع تجديد الشعر من وقت للتاني…
لما بيزيد او بمعني اصح عدد كبير يقع في وقت أقصر من الطبيعي ويبدأ يؤثر عن كثافة الشعر و توزيعه و الشعراية تبقى رفيعة و ضعيفه…
هنا ندخل في مشكلة…
اسبابها ايه ؟؟ 😋
ببساطة سببها بيتلخص في تعرض الشعر لـ توتر او stress عنيف
الكلام ده بيحصل خلال 6 شهور لواحدة حامل او بترضع و جسمها مجهد…
واحد اتعرض لصدمة أو ضغط نفسي كبير..
او حد خس بسرعة او بيتبع نظام فقير من العناصر الغذائية المهمة
زي الحديد و الزنك و البروتين و الفيتامينات زي vit D and B12 …
طيب اعرف ازاي ان عندي تساقط ؟؟ 😵
اولا لازم تفرق بين الطبيعي و اللي مش طبيعي…
يعني انت الطبيعي ان كل يوم يقع منك من 30 ل 100 شعراية
واللي مش طبيعي ان الرقم يبقى الضعف..
يعني هتلاحظ ان المخدة عليها شعر كتير.. او اثناء الحموم كمية كبيرة بتطلع ف ايدك…
او كل مرة بتسرح فيها شعرك بتطلع كمية كبيرة ملحوظة..
خلينا متفقين على نقطة مهمة..
طول ما انت كيتو صح ..شعرك هيحلو و يبقى اقوى و أصح.. 👩🧒
دي الحقيقة ..
المفروض اننا في الكيتو بناكل نسب بروتين و دهون طبيعية جميلة جدا
بتدينا الحديد و البروتين و الزنك اللازم لنمو شعر و اظافر صحي.
و الدهون زي زيت الزيتون و جوز الهند اللي هو أساسي للشعر ..
حد هيرد عليا و يقولي ..
يا سلااام امال انا من ساعة ما بدأت كيتو شعري خس النص ليه ؟؟
نرجع للنقطة الاساسية و هي الدايت و الضغط على الجسم عشان يخس بالعافيه …
يعني مش بتحافظ على نسب البروتين و الدهون اللي المفروض تاخدها يوميا …
ضبط حساباتك كويس قوي و خذ كفايتك من البروتين .
.ماينفعش يوم يعدي عليك بدون ماتاكل فراخ او اسماك او لحوم ..🐄🐏🐔🐟
طب في ناس بتاكل كويس قوي و بردو شعرها وقع !!!!
السر في تعويض الاملاح …متفتكرش ان المغنيسيوم و البوتاسيوم و الصوديوم نقصهم حاجه عاديه …..
دي بتضعف كل حاجة بما فيها حتي العضلات الصغننه اللي ماسكة كل شعراية ف مكانها ….
لازم لازم تراقب أملاحك كويس لانها من اهم الاسباب … و تركز ع الورقيات جداااا
طيب واللي بيصوموا صيام مطول يعملوا ايه ؟! 😌😌
الصيام ماينفعش يستمر لفترات طويلة لانك بتضغط على جسمك و تدخله في starvation و تحرق اخر كارت ليك فى الخسسان …
لازم الصيام ده يبقى منظم و صحي ..يعني تاخد فيه multivitamins كويسه و لازم يبقى فيها حديد و زنك …
و شرب ميه كتير جدا و طبعا تعويض للاملاح كويس جدا …
طيب الناس اللي عندها تساقط شعر حاليا يعملوا ايه ؟! 😥😥
اولا لازم يتأكدوا ان التساقط ده مش وراثي ولا نتيجة مشاكل نفسية ولا نتيجة ثعلبة …
تاني نقطة …تعويض الجسم بالحديد و فيتامين دال و باء و الزنك و السيلينيوم ….
و تغذية الشعر ف زيوت و كريمات غنيه بالفيتامينات ….
أمثلة لأهم الفيتامينات دي …
Ferotrone
و دة بنقرر نأخذه أما بيثبت ان في انيميا ونقص حديد فعلا بتحليل صورة الدم الكاملة
Octatron
غني بالسيلينيوم و الفيتامينات المهمة و antioxidant s
Depovit amp
حقنة بتتاخد كل اسبوع فيها فيتامين ب١٢ و بتحسن امتصاص الحديد جدا
Devarol amp 🤡
و ده الجوكر بتاعنا بيتاخد مره فالشهر لمدة ٣ شهور بما اننا شعب كلنا عندنا نقص في فيتامين دال
و دراسات كتير بتقول انها مشكلة في جيناتنا كمصريين …