الكيتو و القدرات الجينية ..
كأي طالب مشاغب مكنتش محبوب من أغلب المدرسين في المراحل الدراسية المختلفة ،
عدا مادة واحدة دايماً مدرسيها كانوا بيعاملوني كويس ،
دول اللي قدروا يتجاوزوا الصورة النمطية للطالب المجتهد اللي لازم يبقى منظم في كل شيء
، هادي ، مؤدب ، مهندم و ملتزم داخل المدرسة .
مدرسين الرياضيات بأنواعها كلها من أول ما كانت حساب في الابتدائي
لحد ما ربنا أكرمها و تفرعت إلي جبر ، تفاضل وتكامل ، فراغية ، احصاء ،
بلا استثناء كانوا بيعاملونى كويس.
لحد دلوقتى أنا فاكر الأستاذ الصافي ، الأستاذ هلال ، الأستاذ نجيب
و الراجل اللي كان له فضل عظيم عليا مهما حكيت عنه الأستاذ بهجت .
أنا فعلا كنت متفوق في الرياضيات
لدرجة إن لو حصل تعارض بين الناتج النهائي لمسألة ما قمت بحلها و نموذج الإجابة
كنت بشك في نموذج الإجابة الأول .
فاكر أن الأستاذ بهجت كان بيديني مسألتين زيادة أحلهم
لحد ما زمايلي في الدرس يحلوا التمرين بتاعهم .
القصد
أنا مكنتش ببذل مجهود في فهم الرياضيات و كنت متفوق فيها ،
علي عكس زميلي العزيز اللي كان مجتهد و شاطر في كل المواد اللي محتاجة الحفظ
و بالرغم من كدة كان بيلاقي صعوبة في حل مسائل الرياضيات .
لما سألني واحنا في الثانوية العامة إزاي بذاكر الرياضيات ؟
كانت اجابتي انا مش بذاكر الرياضيات ، أنا بتسلى في المسائل كده كنوع من الترفيه
لما بزهق من مذاكرة المواد التانية ، بشغل الراديو و اقعد أحل رياضات و أنا بسمع مزيكا .
الواد طبعا ذهل و قالي يا خبر أبيض أنا مخصص لها كل يوم ساعتين أو تلاتة من وقتي
و برضه لو حاجة مشوفتهاش معرفش أحلها.
في الثانوية العامة أنا جبت 110/110 في الرياضيات و زميلي هو كمان جاب الدرجة النهائية .
نفس الدرجة بس الفرق واحد قدراته ساعدته انه يحصل علي أعلي درجة بسهولة ( وهو بيسمع مزيكا )
و التاني قدراته كانت معاندة معاها فاضطر إنه يجتهد أكتر و أكتر علشان يوصل لنفس النتيجة
( بيذاكر ٣ ساعات رياضيات ) في اليوم .
صديقي أدرك من سن مبكرة أنه يقدر يتغلب على القدرات الفردية بالاجتهاد ،
مستسلمش لفكرة أن دماغه مش مسستم في حل المسائل الرياضية المعقدة
و لا يائس من وجود أمثالي في نطاق معرفته و حول القسم الأدبي حيث تبرز موهبته .
هو كافح ، صابر واجتهد عشان يتغلب علي ضعف قدراته ،
هو كان فاهم أننا مختلفين فاشتغل على نفسه و نجح .
أنا اتعلمت من تجربة زميلي بس متأخر شوية ،
أدركت أن ربنا أراد أن أحمل جينات وراثية سيئة ،
قابلية عالية للإصابة بمرض السمنة و السكري ،
وبالتالي كان الحل أني محتاج اجتهد أكتر و أكتر علشان أتمتع بصحة جيدة ،
كمان مشغلتش بالي بالناس اللي بتاكل كل حاجة ومش بتتخن ،
الناس اللي بتشرب سجاير ومش بتنام غير كام ساعة و بيفضل وشها فيه نضارة .
أدركت أني شخص محدود القدرات الجينية ،
قابل لزيادة الوزن بمجرد رؤية الجاتوهات دون تذوقها ،
شخص يؤثر فيه قلة النوم بصورة مزعجة ، ليلة واحدة بدون نوم تشعرني باكتئاب يدوم لأيام .
كمان أدركت أني علشان احافظ على صحتي محتاج أكتر من الكيتو ،
كمان محتاج استمرارية ، مش خطة قصيرة الأجل تنتهي بالوصول للوزن المثالي .
يوم 4 نوفمبر هكمل سنتين كيتو ، سنتين من الرياضة بانتظام ، سنتين من تحسين جودة النوم ،
سنتين من تقليل ضغوط الحياة ، سنتين وأنا بتجنب أي معارك تستنزف طاقتي و مجهودي .
١- الدايت .
بالنسبة لي في كتير من الأنظمة الغذائية الصحية أفضلها الكيتو و الصيام المتقطع
و لكن لا ينفي قناعتي الشخصية أن أي دايت يشجع على أكل الطعام الغير مصنع
ويبتعد عن السكريات الصريحة ، الزيوت المهدرجة و اللحوم المصنعة
هو دايت صحي حتى لو نباتي .
علشان كدة أنا ملتزم بالكيتو ، مش بخرج منه إلا لغرض أو مضطر
و برجع له على طول بعد الوجبة اللي خرجتها.
٢- الصيام :
بصوم أغلب الأيام عشرين ساعة ، ساعات بصوم 24 و ساعات بطول ليومين و ٣ أيام .
كمان بيجي أوقات بأكل ٣ وجبات علشان أكسر روتين حياتي أ
و علشان محسش بالعزلة الاجتماعية اللي ممكن عدم مشاركة الناس في الطعام تسببها لي ..
٣- الرياضة :
، بلعب رياضة كارديو ، تمارين اطالة ، بشيل حديد
و بدخل السونا من ٢٠ الي ٣٠ دقيقة أغلب أيام الأسبوع .
دلوقتي بلعب أغلب الوقت و أنا صايم بس أنا برضه بنوع في الأوقات و نوع الرياضة .
بيجي عليا أيام مش بروح النادي و أيام اتمرن خفيف
و أيام أتقل وازود الكفاءة علي حسب طبيعة شغلي و حالتي المزاجية .
٤- ضغوط الحياة:
رغم متطلبات العمل المجحفة ، بحاول أقلل الضغوط اللي عليا ،
بحاول أتجنب المشاكل ، بتعمد تجاهل الناس اللي ممكن تضيع لي وقتي أو تؤثر عليا بالسلب .
بحاول أكون هادي أو أبدوا هادئا ..
النوم ، الرياضة ، السونا و صفحات الميمز بتساعدني في ده كتير .
برضه بفشل كتير ، بتوتر و بزهق و بيأس من اللي بعمله
بس برجع أحط نفسي على التراك في أسرع وقت .
٥- النوم :
بنام ٨ ساعات إلا لو عندي شغل بالليل ،
بحاول ازود جودة النوم أن يمتنع عن شرب القهوة بعد الساعة ٢ الضهر ،
حاطط bluelight filter للتليفون ،
كمان بقعد في الضلمة مدة طويلة قبل ما أروح السرير
علشان احسن إفراز الميلاتونين (هرمون النوم).
بس ساعات بقلق ، ساعات مش ببقي عارف أنام
و ساعات بفضل مغمض عيني لمدة طويلة
و بيبقي عقلي شغال تنطيط زي واحد بيرقص داخل صالة ديسكو .
مش بيأس ، برجع تاني أحط نفسي على التراك .
٦-المكملات :
بأخذ مكملات زي ماغنسيوم ، سينتروم ، أوميجا ٣ مع فيتامين ( د ) في الشتاء .
ساعات باخد سيدوفاج و ساعات باربارين barbarin
و ساعات بقعد بالشهور مش باخد المكملات دي تعتمد علي مستوي الطاقة ،
تنويع مصادر غذائي و صايم و لا كيتو و بلعب رياضة ولا لا .
مثلا أسبوع نبطشي و صايم صيام طويل باخد ماغنسيوم بس و السينترم .
باكل و مش بلعب رياضة باخد بالليل سيدوفاج و باربارين
علشان أزود الـ autophagy
و اقلل السكر الصائم في الدم .
نجحت أني في خلال سنتين أحافظ على وزن كويس ،
سكر في حدود الطبيعي و لياقة بدنية عالية بمقارنة بنفسي و أنا عندي عشرين سنة .
بس رغم التزامي الشديد بجميع ما سبق ..
لما بتقاعس لمدة أسبوع أو اتنين عن محاربة السمنة أو حتى لو زادت ضغوط الحياة شوية ،
وزني بيرجع يزيد ، معنوياتي بتقل و مزاجي مش بيبقي تمام .
وقتها بفتكر صاحبي اللي كان بيذاكر ٣ ساعات علشان يتغلب على ضعف قدراته
فـ أبدأ اجتهد أكتر و أكتر ،
أطول الصوم و أقلل الأكل
و ازود الرياضة لحد ما ارجع على نفس التراك .
هفضل كدة لحد امتى ؟
لو عايز أفضل بصحة جيدة و أقلل احتمال الإصابة بأي مرض لازم أفضل كده على طول ،
لأني شخص جيناته معانده ، بيشتغل مهنة كلها ضغوط ،
مسؤولياته كل يوم بتزيد و بتزيد و العمر بيتسرسب من بين ايده زي القابض على الماء
لازم يفضل طول الوقت يقاوم الانتروبيا ( حالة الفوضي ) .
ملهاش حل ، لازم أفضل أحارب السمنة علشان هي لا تكف عن محاربتي .
أنا حربي الحقيقة مع تقدم العمر .
زي ما الكون بيميل لحالة الانتروبي ( العشوائية ) ، تقدم العمر هو اتجاه خلايا جسمك إلي العشوائية ،
مولانا شرودنجر قال في معنى الحياة ( أنها مقاومة الانتروبي ) ،
الأمر بيبدو حتمي وأن مفيش مفر من كرمشة الوش و انحناء الظهر و عجز أجهزة الجسم
و لكن احنا نقدر نقلل العشوائية دي
و كمان فيه ناس متفائلة أكتر مني بتقول أننا في المستقبل القريب هنقدر نمنعها .
القصد لو عايز تعيش حياة صحية لازم تفضل طول الوقت تقاوم حالة الانتروبي
( عن طريق محاربة السمنة و محاربة تقدم العمر )
لأن أغلبنا لم يمنح جينات جيدة تخليه قادر على الحفاظ على وزنه و لياقته
و هو بياكل بيتزا و مكرونة و حلويات كل يوم .
أغلبنا زي زميلي محتاجين نذاكر كويس و نجتهد
لو عايزين نحصل على نفس النتيجة اللي بيحصل عليها شخص جيناته جيدة .
البوست ده علشان الأخت اللي مكتئبة لأنها مخستش غير كيلو في الأسبوعين ،
الأخت اللي شايفة الناس وصلت للمثالي أسرع منها
و الأخ اللي من يوم ما وصل للمثالي و هو شغال ريفيد .
الخلاصة
لو عايز وزن مثالي خس بأي طريقة
إنما لو عايز تحافظ علي صحة جيدة و تعيش حياة أفضل
فـ أنت محتاج خطة طويلة الأجل لمحاربة السمنة و مقاومة الانتروبي .
حارب السمنة لأنها لا تكف عن محاربتك
#حاصر_جيناتك_لا_مفر
#أيام_التدوين
