الأنسولين و حرق الدهون .
لو عندك دولاب و عايز تدخله غرفة النوم ،
صعب تقدر تعديه من فتحة الباب ، طب هتعمل إيه ؟
أكيد هتستعمل مخك و تجيب صنايعي يفكه لك و لما تدخله قطع هترجع تركبه .. .
طيب دخلت مراتك و قالتلك أنا مقولتش لك تحط الدولاب في الاوضة دي أنا عايزاه في الاوضة التانية .
علشان تقدر تطلع الدولاب هتحتاج تاني صنايعي يفكه و يحوله لقطع يكون في استطاعتك أنك تعديها من الباب .
الدهون في الجسم بتتخزن في صورة دهون ثلاثية triglycerides أو بتسمي triacylglycerol .
ببساطة
tri يعني تلاته acyl glycerol يعني واحد من الأحماض الدهنية ماسك في ذرة كربون من الجليسرول .
و بالتالي الاسم يعني عدد ٣ أحماض دهنية ماسكين بسلسلة مكونة من ٣ ذرات كربون اسمها الجليسرول ( اللي هو سكر كحول بالمناسبة )
الدهون الثلاثية ( الدولاب )
مش بتقدر تدخل خلية الدهون ( الأوضة )
لأن جدار الخلية الدهنية ( الباب )
مش بيسمح بكده .
فالجسم بيضطر يجيب صنايعي يفك أجزاء الدهون الثلاثية ل ٣ أحماض دهنية و الجليسرول glycerol .
وبالتالي بيدخلوا بسهولة .
طيب لما الجسم بيعوز يستفيد من الطاقة المخزنة (زوجتك عايزة تخرج الدولاب برة الأوضة بعد ما تركب ) ،
أكيد بتضطر تجيب صنايعي يفك الدولاب مرة تانية .
تعالوا اعرفكم على الصنايعية دول .
الصنايعي الأول :
اسمه lipoprotein lipase) LL) ده عبارة عن انزيم مهمته تفكيك جزء الدهون الثلاثية إلى قطع تقدر تدخل الخلية الدهنية لتخزينها .
الصنايعي التاني :
اسمه hormone sensitive lipase) HSL) .الراجل ده مهمته بتتلخص انه يفك الدهون الثلاثية علشان تقدر تخرج بسهولة زي ما دخلت أول مرة .
ببساطة
الإنزيم الأول : الليبوبروتين لوبيز LL يساعد علي تخزين الدهون
الانزيم التاني : HSL بيساعد علي التخلص منها أو حرقها .
يبقي انا لما اعوز ازود حرق الدهون ابقي محتاج ازود كفاءة عمل الأنزيم التاني و أقلل عمل الأنزيم الأول .
يعني اعمل تنشيط لل HSL و اوقف عمل ال LL علشان مخزن للدهون .
المهم ان الأنسولين يزيد كفاءة الإنزيم بتاع تخزين الدهون
كمان يحفز دخول الجلوكوز داخل الخلايا الدهنية عشان يتحول الجليسرول .
يعني بيزود تخزين الدهون .
بس كدة ؟ لا ميبقاش الأنسولين اللي نعرفه 😄😄
هو كمان يثبط عمل الانزيم التاني بتاع حرق الدهون HSL و بالتالي يمنع حرق الدهون لو مستوي الأنسولين عالي
الخلاصة
١- الدهون الثلاثية : ( الطاقة المخزنة ) بتحتاج إنزيم يساعد على تخزينها وآخر يساعد على حرقها .
٢- الأنسولين العاق : يزود نشاط الأنزيم اللي بيساعد ع التخزين و يقلل نشاط الإنزيم اللي يساعد ع الحرق .
وحسبنا الله و نعم الوكيل 😄😄 .
٣- الكيتو بيقلل الأنسولين ينشط انزيم الحرق و يقل نشاط انزيم التخزين و بالتالي رغم تناولنا لنسبة عالية من الدهون في النظام و لكن يتم حرقها مش تخزينها .
