انخفاض سكر الدم مع الكيتو

لما بيرتفع مستوي الكيتون في الجسم، بينزل مستوي السكر

و بالتالي في الطبيعي سكرك الصايم بيبقي في حدود من 70 إلي 110 مج،

ممكن مع الكيتو السكر الصايم يقل و يوصل لحد 65 مج،

طبقاً لدراسة ( cahill et al 1966) اللي جعل 8 من المتطوعين يصوموا لمدة 8 ايام متواصلة،

في اليوم التالت السكر نزل الي 65 مج و فضل علي نفس المستوي طول مدة الدراسة. 

(بعض الناس ممكن يقل السكر عن كدة بدون أي اعراض بس دي حالات فردية.)

يعني ممكن سكرك ينزل تحت الطبيعي بشوية،

و جسمك مش حيحس بأي أعراض انخفاض للسكر لإن الكيتونات بتبقي مصدر طاقة بديل بيمد المخ بالطاقة اللازمة للقيام بوظايفه الحيوية.

(أعراض انخفاض السكر المعروفة زي

الرعشة، التعرق، الجوع الشديد، العصبية الزائدة، ارتفاع ضربات القلب و الدوخة و بتوصل للإغماء.)

انما لو حسيت بدوخة او هبوط عام و قيست السكر لقيته واطي عن المعدل الطبيعي

يبقي لازم تاكل في الحالة دي وجبة فيها كربوهيدرات، 

كمية الكربوهيدرات و نوعها في الحالة دي بتعتمد علي نسبة السكر كام في جسمك و شدة الأعراض المصاحبة له. 

عموماً علاج انخفاض السكر أولي من الحفاظ على الكيتوزيز و أولي من الدايت نفسه. 

نصيحة للناس اللي سكرها بينزل عن 65 اثناء الصيام ::

ظبط نسبة الكربوهيدرات اعتمادا علي قياس السكر الصايم،

مثلاً لو بتاخد 20 جم نت كارب و تاني يوم لقيت السكر 60 مج،

ارفع النت كارب ل 25 جم بحيث يبقي السكر الصايم دائماً في حدود 70 مج. 

نصيحة تانية ::

متزودتش الصيام عن 24 الي 36 ساعة طالما جسمك مستجيب علي الدايت، و أول ما تتعب في أي وقت لازم تاكل. 

الغرض من الدايت تحسين الصحة العامة،

مش عمل ارقام قياسية في عدد ساعات الصيام او في ارتفاع نسب الكيتون في الدم.