الرئيسية » الكيتوجينيك دايت » الكيتو والأمراض » الكيتوجينيك دايت و دهون الكبد؟

الكيتوجينيك دايت و دهون الكبد؟

share this :

طيب علشان نجاوب علي سؤال هل الكيتوجينك دايت بيسبب دهون علي الكبد،

لازم نعرف الأول ازاي بتتكون دهون علي الكبد.

طيب علشان نعرف ده لازم نعرف الأكل بتاعنا بينهضم ازاي.

بص يا سيدي أنت حتي لو بتاكل كربوهيدرات، الدهون اللي بتاكلها مش بتروح علي الكبد ولا بتمشي في الدم. 

ببساطة الدهون عبارة عن حاجتين

دهون ثلاثية ودي الغالبية العظمى من الدهون اللي بتاكلها و كوليسترول ،

لما بينزلوا الجهاز الهضمي جزء بيتاخد لبناء الأنسجة و جزء بيتاخد كطاقة

والغالبية العظمي بيبقي حجم الجزئ كبير و مش بيعدي في الدم،

بيتشال في حاجة chylomicrone كيالوميكرون، وبتمشي في الجهاز الليمفاوي،

تغذي شوية في العضلات و تحط الباقي في الخلايا الدهنية و بتتحول لحاجة اسمها chylomicrone remnant،

دي بقي بتروح الكبد علشان تتهضم و يطلع كيلوميكورن جديد. 

ببساطة الكيلوميكرون عبارة عن معدية بتاخدها من شط النهر ( الجهاز الهضمي) للبر التاني ( الخلايا الدهنية) 

طيب اومال ايه اللي بيعمل دهون علي الكبد. و بيرفع الدهون في الدم بقي، لما الدهون طلعت بريئة لا بتروح الكبد ولا بتعدي في الدم؟

هو فيه غيرها، الملعونة في كل كتاب، أساس كل كرب (الكربوهيدرات). 

نشوف ازاي؟ 

الكربوهيدرات بتتحول لجلوكوز، بيعدي في الدم، يرفع مستوي السكر، يطلع الانسولين،

يدخله الخلية، يفضل شوية، يحولهم لجلايكوجين بس للأسف سعة الجسم لتخزين الجلاكوجين مش كبيرة،

فيقوم الانسولين يعمل ايه يا حضرات؟ 

يحول الجلوكوز لدهون ثلاثية في عملية اسمها denovo lipogenesis يعني تكوين دهون جديدة. 

الدهون اللي بتتكون دي بياخدوها سفن شحن اسمها Lipoprotein زي VLDL, IDL,LDL,HDL

السفن دي بتتحول من وحدة للتانية علي حسب الكثافة، يعني VLDL بتشيل الدهون الثلاثية والكوليسترول اللي اتكونوا في الكبد و بتودي الدهون الثلاثية للخلايا الدهنية و بتعدي عن طريق الدم ( عكس الدهون اللي بتاكلها)

و بعدين تتحول IDL ثم LDL اللي بيرجع الكبد. 

بتلاحظ ان الدهون الثلاثية بيرتفع في الدم مع مرضي السكر، السمنة . 
لان الكبد بيحول السكر لدهون بمساعدة الانسولين

طيب ايه اللي أخطر من الجلوكوز بقي؟ 

الفراكتوز ( سكر الفاكهة) ده الجسم مش بيهضمه ولا الخلايا بتقبله،

فبيروح يتهضم في الكبد لان الكبد هي مصفاة السموم،

الكبد طبيعي بمساعدة الانسولين حيحوله لدهون،

نفس اللي بيحصل لما تشرب كحوليات علشان كدة فيه مرضين مختلفين alcoholic fatty liver, non alcoholic fatty liver.

للأمانة العلمية بعض الدراسات بتقول ان نزول الوزن السريع بيعمل دهون علي الكبد

ولكن ده بيحصل مع الناس اللي بتنزل علي انواع دايت عجيبة زي الريجميات الكيماوية

او حتي بعد العمليات الجراحية للسمنة ولكن لم تثبت بعد الكيتو دايت،

ده علشان حاجة مهمة ان الكيتو دايت بيقلل مستوي الانسولين. 

طيب في الآخر احب اقول ان الكيتوجينك دايت بتعالج الدهون اللي علي الكبد مش سبب في تكونها ..

share this :

عن admin

د.محمد الصباغ . طبيب مختص غدد صماء و سكر. بالمملكة المتحدة .. زميل الكلية الملكية ببريطانيا MRCP UK حاصل على شهادة الاختصاص العليا في الغدد الصماء والسكر من الكلية الملكية. SCE endocrinology and diabetes مهتم بأبحاث السمنة والتغذية العلاجية كجزء من التخصص الدقيق.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *