Constipation (الامساك)
الأسباب والحلول :
معدل دخول الحمام الطبيعي بيختلف من شخص للتاني ،، يومياً ،، كل يومين او كل ٣ ايام ،، دا طبيعي
امتى نقول ان فلان عنده امساك؟
لما يتحقق فيه شرطين..
تاخير مده دخول الحمام اكتر من المعتاد
صعوبه فالاخراج(الم-انتفاخ وعدم قدره على الاخراج)
أسباب الامساك كتيره جدا لكن النظام الغذائي ليه دور كبير في الاسباب وفي العلاج،،
علشان كده الناس الغير ملتزمه بنظام الكيتو باحتياطاته دايما بيشتكو من الامساك وغالبا بيبقو نفس الناس اللي بيشتكو من اعراض تانيه كتير ناتجه عن عدم الالتزام.
فـ كلامنا هيكون باستثناء اي حاله مرضيه فالاصل..
ليه الامساك مشكله شائعه في نظامنا الغذائي؟؟
أولاً :
نقص الالياف ..
الألياف دايما اول حاجه بننصح بيها اي حد عنده امساك سواء كيتو او لا،، ليه؟
الالياف عباره عن كارب غير مهضوم ف بيزود حجم الفضلات وبيسهل خروجها..
الدراسات اثبتت اننا مفروض ناخد يوميا حوالي ٣٠ جم من الالياف ، واحنا عندنا الالياف من الخضراوات الورقيه مسموحه بدون حساب ولا حدود ف دي نقطه كويسه فالكيتو واحنا بنغفل عنها دايما.
طيب حد بياخد الياف ومفيش تحسن!
أولاً : يتاكد انه بيشرب مياه كويس ،، ليه؟
لان الالياف دي بتمتص المياه علشان تسهل عمليه الاخراج ،، بدون المياه هتكون الياف جافه وتعمل نتيجه عكسيه
ثانيا في دراسات بتقول ان زياده الالياف اكتر من اللازم بتعمل نتيجه عكسيه!
ثانياً:
الأكل القليل..
احنا نظامنا اهم نقطه فيه انه بيقلل شهيتنا للاكل (لان الدهون بتشبعنا-الكيتون باديز ليها تاثير مثبط للشهيه- مافيش انسولين طالع نازل يجوعنا)
فـ لما يقل الاكل هيقل الاخراج والنقطه دي مفروض ماتقلقناش ، لو حصلت اعراض زي الانتفاخ او المغص او الالم ممكن لو ماشي على وجبه تخليهم وجبتين ف يوم وتشوف.
ثالثا:
الخلل البكتيري..
و دا هيرجعنا للالياف تاني بس بشكل مختلف..
احنا في الامعاء عندنا بكتيريا نافعه و بكتيريا ضاره،،
وجود البكتيريا النافعه بيفيد في حاجات كتير خاصه بالمناعه والفيتامينات و وجودها بيثبط عمل البكتيريا الضاره ،،
بيخليها قليله وخامله تمام؟
البكتيريا دي بتتغذى على الألياف ، فـ لما بتقل الالياف مش بتلاقي اكل فـ بتجوع وبيحصل خلل بكتيري ,
الخلل دا بيعمل مشاكل هضميه كتير اكثرها شيوعاً هو الامساك ،
واللي ممكن يزود الخلل اني أقلل الالياف جدا وأزود الدهون في نفس الوقت
علشان كده فالكيتو بنقول ان الاهتمام بالخضراوات الورقيه مش مجرد احتياط، دا من اساسيات النظام
رابعاً :
قلة الحركه .
اننا مش بنعتبر الرياضه جزء مهم في نظامنا ومعظمنا كسالى والوزن بينزل واحنا عالمكتب ف بيزيد الكسل وتقل الحركه وقله الحركه احد اسباب الامساك.
دي اهم نقط ممكن تخصنا فالكيتو عن الامساك..
و الحل؟
1- حافظ علي تناول الخضروات الورقية والافوكادو بكمية كافية او تناول بذور الشيا يومياً، او قشور السليوم يومياً
2- وقف اقراص الكالسيوم لو بتاخدها، تناول الماغنيسوم لوحده لانه ملين
3- زيت جوز الهند او زبدة جوز الهند فيها دهون مشبعة متوسطة السلسة و لها تأثير مضاد للامساك
4- تناول علي الاقل 3 لتر مياه يومياً.
5- فيه ناس بتاخد عشبة السنامكي لعلاج الامساك
6- تقدر تاخد اي دوا امساك لو الوسائل اللي فوق فشلت.
7- معلقه زيت زيتون عالريق
8- اتحرك شويه تمرينات خفيفه او مشي.
مافيش تحسن ؟ يبقى المشكله مش من الكيتو وتزور العياده تكشف وتتطمن على نفسك❤️
