الرئيسية » الكيتوجينيك دايت » الكيتو والأمراض » المراره و الكيتو دايت

المراره و الكيتو دايت

share this :

كتبت د. ساره يسري

ما هي وظيفة المراره ؟

 
تخزين العصاره المراريه bile juice وتركيزها وقت الصيام او في عدم وجود اكل،،

لما بناكل في انزيم اسمه cholecystokinin بيفرز من الجزء الاول من الامعاء بيحفز المراره انها تنقبض وتضخ العصاره دي فالامعاء علشان تهضم الاكل او الدهون خاصة ً..

ايه العصاره دي اصلا؟ 

دا سائل بيطلع من الكبد يومياً بمقدار ٤٠٠ الى ٨٠٠ مل للشخص البالغ

العصاره المراريه (bile juice ) بتتكون من :
٩٧٪؜ مياه
٠.٧٪؜ املاح مراريه (bile salts)
٠.٥١٪؜ دهون زي الكوليستيرول والاحماض الدهنيه..
وبيليروبين واشياء اخرى😃

ايه فايده العصاره دي ؟ هضم الدهون ،،، ازاي؟

عارفين الحاجه الدهنيه لما نضيف ليها صابون ،، بتروح دهنيتها بيحصل زي ذوبان للدهون فالصابون ،،

العصاره دي بتعمل كده فالدهون بالظبط بتحولها لجزيئات صغيره علشان تسهل هضمها،،

والاملاح المراريه بتغلف الجزيئات دي علشان تمنع انهم يتحدو تاني ويتجمعو ويبقو جزيئات دهون كبيره..

العمليه دي بتزود مساحه سطح الدهون دي وبتسمح للانزيمات انها تدخل للخلايا الدهنيه عن طريق الفجوات اللي بينهم (اللي عملتها الاملاح المراريه) وتكسر الدهون وتخليها تمتص في الامعاء،،

لو محصلتش العمليه دي الدهون هتنزل في الفضلات لان الجسم مش هيعرف يهضمها .

دي باختصار وظيفه العصاره المراريه في هضم الدهون ومنها عرفنا اهمية المراره،، في تخزين العصاره وتركيزها..

احنا قولنا قبل كده ان الكوليستيرول بيتصنع اساسا من الكبد (٨٠٪؜)

ودلوقتي قولنا انه بيدخل في تصنيع العصاره المراريه علشان يساعد على هضم الدهون

ودي من اهم استخدامات الجسم للكوليسيترول..

طيب في حال ان المراره تراكم جواها العصاره المراريه وبالأخص الكوليستيرول ،

إما لانها مراره مريضه في الاصل غير قادره على الانقباض بشكل جيد ومتواصل ،،

او انك انت قللت اكل الدهون جدا فـ قللت الاشارات اللي بتروحلها علشان تنقبض ،

فـ أصبحت كسلانه ومش بتنقبض كويس بالدرجه اللي تسمح لها انها تفضي العصاره اللي جواها،،

او بسبب زياده نسبه الكوليستيرول في العصاره و دا السبب الاهم معانا في الكيتو..

وجد ان زياده الدهون الثلاثيه والكوليسيترول الضار VLDL ونقص الكوليسترول النافع HDL هم سبب زياده الكوليسترول في العصاره،،

بالتالي هم سبب مهم من اسباب تكوين الحصوات المراريه..

واثبت كمان ان الكاربوهيدرات هي السبب في زياده الكوليسترول دي..

بالتالي اثبت ان الحميه منخفضه الدهون عالية الكارب سبب من اسباب تكون حصوات المراره بعكس المتعارف عليه! 

كمان وجدوا ان مقاومه الانسولين في حد ذاتها وارتفاع السكر في الدم بيزودوا خطر الاصابه بحصوات المراره!!

دي اول نقطه تهمنا لاننا اتكلمنا كتير عن التاثير الايجابي للكيتو فالحالات دي،،

ايه مشكلة الحصوات؟؟ 

الحقيقه كتير من الناس اللي عندهم حصوات مش بيعرفو الا لو اكتشفوا الموضوع بالصدفه ،

إما مظهرش اعراض او عندهم اعراض خفيفه خاصه بالهضم مخطرش في بالهم انها بسبب المراره.. دول الناس اللي بنقولهم الكيتو ينفع معاكم،،

طيب هل دول ممكن الكيتو يسببلهم مغص؟؟

ايوا ممكن يسبب مغص في الاول كم مره كده .. ايه السبب؟

السبب ان المريض دا غالبا كان ماشي على دايت منخفض الدهون طول عمره ،، مرتفع الكارب ،

وعنده سمنه وكوليسترول عالي غالبا ، فـ كان عنده حصوات لكن المراره ما كانتش بتنقبض كويس زي ماقولنا،

فـ ماكنش في مشكله لان الحصوه فالمراره مش بتعمل اعراض طول ماهي داخل المراره مش بتتحرك ،

مع الكيتو المراره بدات تنقبض بشده فـ الحصوات بتنزل من المراره للقناه المراريه تعمل ألم..

الشخص ده مريض في الاصل واكتشف الموضوع بالكيتو،

الحل معاه انه يقلل الدهون جدا للدرجه اللي تمنع حدوث الم او اضطراب..

ويعرف ان اي تعب هو مؤقت فقط لحد ما الجسم يتكيف على نظام الاكل الجديد..

المرضى دول شبه مُجمِعين ان المغص فعلا بيختفي بعد فتره قصيره من الكيتو ،،

و دا يرجعنا لدراسه اتعملت على مجموعه من الناس..

الناس دول باختصار عملوا لهم فحص بالسونار قبل الدراسه لقوا ان مفيش عندهم حصوات ،،

مشوهم على ريجيم قاسي لاحظوا ان في جزء كبير منهم جسمه كون حصوات ،،

رجعوهم لـ اللايف ستايل العاديه ، لقوا ان الحصوات اما اتفتت او نزلت من المراره .

دا بيكون تفسير المغص اللي بيظهر لبعض الناس ف بدايه الكيتو ويختفي ،، وطبعا دا العيان بيتاكد منه بالسونار .

 

طيب لو انا مريض والحصوات دي بتسببلي مغص حاد من قبل الكيتو ؟

المغص المراري من الحاجات اللي ممكن تستوجب النقل للمستشفى احيانا،،

فـ العيان دا علاجه الاول والأصح هو الجراحه،، المفروض يشيل المراره..

طيب ينفع معاه الكيتو؟؟

اه ياكل الدهون اقل من النسب بتاعتنا ويمشي كيتو ،،

طيب والمغص؟؟

هيجي له طبعا لانه بيجي له في الطبيعي فـ هيفضل يجيله دايما

عشان كده بنقول اتعالج من المراره الاول سواء هتمشي كيتو او لأ لانك مش هتقدر تتحكم في الموضوع طول عمرك مهما حاولت.

طيب واللي شال المراره ايه وضعه؟؟

زي ماقولنا العصاره بتخرج من الكبد اصلا فـ هتفضل تطلع بس بدون تخزين يعني هتطلع من الكبد للأمعاء على طول ،

اللي شايل المراره محتاج بس بعد العمليه شهور بسيطه لحد ما الجسم يتكيف على عدم وجود المراره،،

وبعدها لما يدخل كيتو هيدخل بالتدريج..

هيزود الدهون شويه ، ممكن يحصل إسهال في الاول او اضطراب فالهضم بشكل عام بس دا عادي لحد ما يلاقي الاخراج بقى طبيعي والجسم مرتاح يزود شويه كمان وهكذا،،

بعد كده الجسم بيتكيف على هضم الكميه دي من الدهون بدون اي مشاكل و دي حاجه يأكدها لنا الكيتونيين اللي شايلين المراره ..

share this :

2 تعليقان

  1. طيب انا بعد ما دخلت الكيتو بقي يجيلي الم شديد جدا في رقبتي من ناحيه اليمين وجالي مرتين في حوالي شهر والحقيقه انه مزعج جدا فهل ده من تاثير الكيتو ؟؟؟ و لا ده مراره علما ان انا عمري ما اشتكيت من المراره
    الاسوا بقه اني انا من يوم ما دخلت الكيتو وانا عنيه صفرا شويه فده في رايكو ايه ؟؟؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *